شارپرێس:
وەزارەتی گەنجینەی ئەمریکا هۆشدارییه‌كى به‌په‌له‌ى ئاراسته‌ى ئێران كردو ڕایده‌گه‌یه‌نێت، "سزای نوێمان بەسەر کەرتی نەوتی ئێران‌و چەند کۆمپانیایەکی بازرگانیدا سەپاندوە کە لەناویاندا بازرگانێکی عێراقیش هەیە".
سکۆت بێسنت وەزیری گەنجینەی ئەمریکا لەپەیامێکی ڤیدیۆییدا ڕایگه‌یاند، وەزارەتەکەیان چەند هەنگاوێک دەگرێتەبەر بۆ ڕێگریکردن لەفراوانبونی هەژمونی ئێران لەناوچەکەو جیهان، بەتایبەت زیادبونی هەژمونی ئێران لەعێراق.
ئاشكراشیكردوه، "بەم پێیە، وەزارەتەکە سزای بەسەر تۆڕێکی کۆمپانیاو کەشتیی بازرگانی نەوت‌و بازرگانێکدا سەپاندوە کە بەقاچاخ نەوتی ئێرانیان بەناوی نەوتی عێراق هەناردەی دەرەوە کردوە".
به‌وته‌ى بێسنت، "ئەم تۆڕە بازرگانییەی سزادراون، نەوتیان بەوڵاتە هاوپەیمانەکانی ئەمریکا فرۆشتوەو دورنییە نەوتەکە گەیشتبێتە ئەمریکاش، ئەمەش پێشێلکارییەکی ڕونی یاساکانی ئەمریکایە".
جه‌ختیكردوه‌ته‌وه، "واشنتۆن بەتوندترین شێوە فشاردەخاتەسەر ئێران بۆ وشککردنی سەرچاوە داراییەکانی کە بۆ پشتیوانی گروپە توندڕەوەکان بەکاریدەهێنێت‌و دەبنە هەڕەشە بۆسەر ئاسایشی ناوچەکە".
وه‌زیره‌كه‌ى ئه‌مریكا ئه‌وه‌شى نه‌شارده‌وه، "لەگەڕانەوەی ترەمپ بۆ دەسەڵات تائێستا، فشارێکی زۆر خراوەتەسەر ئێران‌و بەڕێژەیەکی بەرچاو هەناردەی قاچاغی نەوتی ئێران کەمبوەتەوەو داهاتی تاران دابەزیوە، ئەمریکاش پابەندە بەدابینکردنی بازاڕێکی نەوتیی کە ئێران لێی بەدەربێت، واشنتۆن بەردەوامدەبێت لەبەئامانجگرتنی هەرلایەنێک کە بەشداربێت لەپێشکەشکردنی پاڵپشتی دارایی بۆ پڕۆژەکانی ئێران".
لاى خۆیشیه‌وه وەزارەتی گەنجینەی ئەمریکا لەڕاگەیەندراوێکدا لەسەر ماڵپەڕی فەرمی خۆی ئاشكرایكردوه، "ئەو بازرگانەی سزادراوە، بازرگانێکی عێراقییە بەناوی (وەلید سامەڕائی)و دانیشتوی ئیماراتە، ناوبراو زنجیرە کۆمپانیایەک بەڕێوەدەبات کە نەوتی ئێرانیان تێکەڵ بەنەوتی عێراق کردوەو لەبازاڕی جیهانیدا بەناوی نەوتی عێراق ساغیانکردوەتەوە، بەمەش ساڵانە نزیکەی 300 ملیۆن دۆلار داهاتیان بۆ ئێران دابینکردوە".
