شارپرێس:
سەعات شەش و دوانزە خولەكی بەیانی بەكاتی تاران فرۆكەی گەشتی ژمارە " PS752 "ی سەر بە هێڵی فرۆكەوانی ئۆكرانی لەفرۆكەخانەی نێودەوڵەتی ئیمام خومەینی لە تاران هەڵفری، دوای ئەوە بەكەمتر لە سێ خولەك فڕۆكەكە لەبەرزبوونەوە وەستا و ئاراستەكەی گۆڕا دواتر كەوتە سەرزەوی .
لەوكاتەدا چی روویدا؟
بەگوێرەی گێرانەوەكانی سوپای پاسداران ئەفسەرێكی سەر بەهێزەكانی بەرگری ئاسمانی تەنێكی نامۆی بەسەر یەكێك لەپێگە هەستیارەكاندا بینیوە و وایزانیوە، كە موشەكی كروزە، بەجۆرێك ئەفسەرەكە هەوڵیداوە پەیوەندی بەفڕۆكەكەوە بكات و بۆ ئەوەش ١٠ چركە چاوەڕێی وەڵامدانەوەی كردووە، بەڵام كاتێك هیچ وەڵامێك نەبووە ئیتر بڕیاریداوە موشەكێكی ئاراستە بكات، كە موشەكەكە لەجۆری زەوی بەئاسمان بووە لەجۆری SA-15 ، كە موشەكێكی سۆڤێتییە .
دوای ئەوە بەپێی داتاكان دەركەوتووە، فڕۆكەكە ئاراستەكەی گۆڕاوە، كە بەپێی قسەی سوپای پاسداران گۆڕینی ئاراستەكەی هۆكاری تێكشكانی بووە، بەڵام ئۆكرانیا دەڵێت: راستەوخۆ بەهۆی موشەكەكەوە كەوتووەتە خوارەوە و تێكشكاوە .
ئەوەی زانراوە، كە فڕۆكەكە لەكاتی بەركەوتنی موشەكەكە لەبەرزی ٢٥٠٠ مەتردابووە و دوای ئەوە لەكۆنترۆڵ دەرچووەو سەربەرەو خوار بووەتەوە تەنانەت بەشێك لە پارچەكانی لەئاسماندا لێبوونەتەوە .
لەكۆتاییدا فڕۆكەكە لەناوچەیەكی نێوان بەرمد و شەهریار كەوتووەتە سەر زەوی و دەستبەجێ تەقیوەتەوە، كە ١٧٣ سەرنشینشی تێدا بووە .
سوپای پاسداران دەڵێت: هەر لەكاتی رووداوەكەدا سەركردایەتی ئێرانی ئاگاداركردووەتەوە، بەڵام ئێران بۆ ماوەی چەند رۆژێك نكووڵی لەوە دەكرد، كە ئەوان دەستیان لە كارەساتەكەدا هەبێت، هەروەها باسیش دەكرێت چەندین ئامێری وەك حەفارە و شۆڤڵی بردووەتە ناوچەكە بۆ ئەوەی پێش ئەوەی لێكۆڵەرە نیودەوڵەتییەكان بگەنە جێبەڵگەكان بشێوێنن، بەڵام لەژێر سایەی بەڵگەكانی مانگە دەستكردەكان و ئەو گوشارە نێودەوڵەتییەی دروست بوو، ئێران پاشەكشەی كرد و دانی بەوەدانا، كە فرۆكەكە بە موشەكی ئەوان خراوەتە خوارەوە .
وەرگێڕان: ئاكۆ عەبدوڵڵا ئاڵی