شارپرێس:
مەکتەب سیاسییه‌كى پارتی هێرشده‌كاته‌وه‌سه‌ر دواین بڕیاری دادگای فیدڕاڵی سه‌باره‌ت به‌محه‌مه‌د حه‌لبوسى، ده‌شڵێت، "ئه‌و بڕیاره جەمسەربەندی لەعێراقدا دروستدەکات، ئەمە لاوازی دامەزراوەکان‌و بێتوانایی دامەزراوەکان نیشاندەدات لەمکاتەدا، ئەم بڕیارە نایاسایی‌و زۆریش هەڵەبوو لەمکاتەدا".
هۆشیار زێباری ئەندامی مەکتەب سیاسی پارتی دیموکراتی کوردستان لەکۆڕبەندی چوارەمی مێپس ڕایگەیاند، "وەک سەرۆک وەزیرانی بەریتانیا تۆنی بلێر لەقسەکانیدا باسیکرد، دەمانویست ئەمساڵ ساڵێکی باش‌و خۆشگوزەران بێت، بۆ ئاساییکردنەوەی پەیوەندییەکان، بەڵام جارێکی تر گەڕاینەوە بۆ ئەوەی وەڵامی ئەو پرسیارە کۆنە بدەینەوە، کە ئایا ئاشتی‌و ئاسایش لەڕۆژهەڵاتی ناوەڕاست هەیە؟ من زۆر بەسادەیی دەڵێم نەخێر".
زێباری ده‌ڵێت، "ئەوەی لە7ی ئۆکتۆبەرەوە دەستیپێکردوەو هێرشکرایەسەر جولەکەکان، ئیسرائیل خاڵی وەرچەرخان بوو، زۆر لەهێرشەکانی دیکەی جیاوازتر بوو، ئەمە هەڕەشەیەکی لەناوبەرە بۆ هەردولا، لەساڵی 2014 لەگەڵ وه‌فدێكى وڵاتانی عەرەبی، سەردانی غەززەم کرد، هەست بەئازارو ناسۆرەکانی خەڵکی غەززە دەکەم، دەزانم دۆخی غەززە تێکچوە، لەهەموو ڕویەکییەوە بەتایبەت لەڕوی مرۆیی.
ئەندامەکەی مەکتەب سیاسی پارتى جه‌ختده‌كاته‌وه، "ڕاشکاوانە ده‌یڵێم، ئەوەی ئێستا ڕودەدات زۆر جیاوازە، وەڵامەکان‌و دەرئەنجامەکان زۆر خراپن، بەهەموو ستاندەرێک وەکو ڕابردوو نەبوە".
ئه‌وه‌شى وت، "ئێستا زیاتر لە 230 کەس بەبارمتە گیراون، کە خەڵکی سڤیلن، ئەمەیش وایکردوە کە ئیسرائیل بچێت بەدوای حەماسدا، من نازانم ئیسرائیل چۆن بیردەکاتەوە، من وتەبێژو پارێزەری ئەوان نیم، بەڵام پێموایە، ئەمە شەڕێکی تەواو جیاوازەو پێم باشە خەڵکی تۆزێک بەبارودۆخی خۆیدا بچێتەوە، هەر وەک تۆنی بلێر وتی، ئەمە شەڕێکی جیاوازە، جیهانێکی جیاوازە".
زێباری زیاتر وتى، "من یەکسەر دەرئەنجامەکەت پێدەڵێم، 11 سێپتەمبەر سیاسەتی جیهانی گۆڕی، وایکرد کە هەندێک بڵێن، عێراق ئازادکراو هەندێک بڵێن داگیرکرا، ئەفغانستانیش بەهەمانشێوە، بەڵام لەڕاستیدا توندڕەوە ئیسلامییەکان کردیان، بەهەمانشێوە ئەوەی لە7ی ئۆکتۆبەر ڕویدا جارێکی دیکە، ئیسلامییە توندڕەوەکان ئەنجامیاندا".
به‌بۆچونى زێباری، "لەعێراقی نوێدا ئەوەی کە ئێمە ڕوبەڕوی بوینەوە، قاعیدا هەمان ترێندبوو، هەمان ڕەهەندی توندڕەوی بوو کە ئێمە ڕوبەڕوی بوینەوە، بۆیە من پێموایە ئەم شەڕە فراوان دەبێت، خوێندنەوەی من ئەوەیە کە من دەیبینم، مەترسی ئەوەش هەیە ناوچەکە ببێتە ململانێیەکی هەرێمی، چونکە هەموو پێکهاتەکان‌و هۆکارەکانیشی هەن، من دەزانم 7ی ئۆکتۆبەر ڕۆژهەڵاتی ناوەڕاست دەگۆڕێت، ئەمە خوێندنەوەی منە".
هەروەها من لەعێراق، هاوڕام لەگەڵ د. فوئاد حوسێن، هەرێمیش بەدور نییە، لەم بەرەو پێشچونانە، ئێمە دەبێت یەکگرتوی هەرێم بپارێزین‌و پەیوەندییەکانی نێوان عێراق‌و هەرێمیش باشتر بکەین، بۆ ئەوەی ئامادەبین بۆ هەرشتێکی نەخوازراو کە ڕودەدات.
له‌كۆتایی قسه‌كانیدا وتى، "کاتێک کە دۆخەکە لەکۆنتڕۆڵ دەرچوو ئیتر خەڵکی بەئاڕاستەیەکی تر دەچێت، پێچەوانەی ئەوەی تۆ دەتەوێت، لەعێراقیش بەداخەوە ڕوبەڕوی کات‌و ناسەقامگیر دەبینەوەو دواین بڕیاری دادگای فیدڕاڵی بەلابردنی حەلبوسی، بەڕاستی هاوشێوەی نەبوە، ئەمە جەمسەربەندی لەعێراقدا دروستدەکات، کێشە لەعێراقدا دروستدەکات، بەڕاستی نادادپەروەرانە بوو، نایاسایی بوو، ئەمە لاوازی دامەزراوەکان‌و بێتوانایی دامەزراوەکان نیشاندەدات لەمکاتەدا، ئێمە بەرەو چەند هەڵبژاردنێک دەچین، هەروەها دۆخی ناوچەکەش باش نییە، ئەم بڕیارە لەمکاتەدا باش نییە، زۆر هەڵەیە، دەبێت شتێکی هەڵە ڕویدابێت".
کۆڕبەندی ئاشتی‌و ئاسایشی ڕۆژهەڵاتی ناوەڕاست بەبەشداری زیاتر لە 150 کەسایەتی سیاسی‌و شارەزای ناوخۆیی‌و نێودەوڵەتی بەڕێوەدەچێت، لەکۆڕبەندەکەدا چەندین پانێڵ بەڕێوەدەچن کە گفتوگۆو گۆڕینەوەی بیروڕا لەسەر دۆخی عێراق‌و هەرێم‌و ناوچەکە دەکرێت، هەروەها ئالنگاری ئەمنی‌و ئابوری‌و سیاسی‌و بارودۆخی ئەمنی ڕۆژهەڵاتی ناوەڕاست، گۆڕانەکانی کەشوهەواو ڕوبەڕوبونەوەی ئاڵنگارییەکان‌و کەمکردنەوەی گرژییەکان تاووتوێدەکرێت.
کۆڕبەندی مێپس کۆڕبەندێکی ساڵانەیە لەلایەن زانکۆی ئەمریکی کوردستان لەدهۆک ڕێکدەخرێت، لەسەر ئاستی هەرێم، نێچیرڤان بارزانی سەرۆکی هەرێمی کوردستان، مەسرور بارزانی، سەرۆکی حکومەتی هەرێم، قوباد تاڵەبانی جێگری سەرۆکی حکومەتی هەرێم‌و بافڵ تاڵەبانی سەرۆکی یەکێتیی، ڕێبەر ئەحمەد وەزیری ناوخۆی حکومەتی هەرێم‌و هۆشیاری زێباری ئەندامی مەکتەبی سیاسی پارتی‌و دەیان کەسایەتی دیکە بەشداری دەکەن.
