رەوتی فوراتەین دووەمین کۆنگرەی گشتیی خۆى ئەنجامدا و محەمەد شیاع سودانى بە ئەمیندارى گشتیی رەوتەکە هەڵبژاردەوە.
ئەمڕۆ هەینى 25ـی نیسانى 2025، رەوتی فوراتەین دووەمین کۆنگرەی خۆی بە دروشمى "ئاوەدانکردنەوە و گەشەپێدان" بەسەرپەرشتیى کۆمیسیۆنى باڵاى سەربەخۆى هەڵبژاردنەکان ئەنجامدا.
بەگوێرەى راگەیەندراوى دواى کۆنگرەکە، رەوتەکە پێداچوونەوەی بە چەند پرسێکى گرنگدا کردووە و لە رێگەی خستنەڕووی دیدگایەکی نیشتمانییەوە لەسەر ئاستەکانی ئابووری، کۆمەڵایەتی و ئەمنی، پشتیوانیى خۆى بۆ حکومەتى عێراق دووپاتکردووەتەوە.
هەروەها رەوتەکە، جەختی لە پاڵپشتیی بەردەوام بۆ دامەزراوەکانی دەوڵەت و بەدواداچوون بۆ ئەنجامدانى چاکسازى و پابەندبوون بە دەستوور و یاسای عێراق کردووەتەوە.
هەر لە کۆنگرەکەدا، جەخت لە گرنگیى ئەنجامدانى هەڵبژاردنى ئەنجوومەنى نوێنەرانى عێراق کراوەتەوە لە وادەى دیاریکراوى خۆیدا ئەوەش بە فەراهەمکردنى ژینگەیەکى شەفاف و دادپەروەرانە بۆ دەنگدەران.
رەوتی فوراتەین لە کانوونى دووەم 2019 لەلایەن محەمەد شیاع سودانییەوە دامەزراوە و بە ئەمیندارى گشتیی رەوتەکە هەڵبژێردراوە، لە هەڵبژاردنى 2021 دوو کورسیی ئەنجوومەنى نوێنەرانى عێراقى بەدەستهێناوە.
