شارپرێس ـ شه‌پۆل عه‌بدوڵڵا:
بەدەستپێکی فەرمی هێرشی بەرامبەری نێوان ئێران‌و ئیسرائیل لەناوەڕاستی حوزەیرانی 2025، ڕۆژهەڵاتی ناوەڕاست جارێکی دیکە لەلێواری شەڕێکی تەواودایە، ململانێکان کە بەئۆپەراسیۆنی شێرێکی گەورەی ئیسرائیل دەستیپێکردوە، تائێستا بوەتە هۆی کوژرانی دەیان فەرماندەی باڵای سەربازی ئێران‌و قوربانییه‌كى زۆرى مرۆیی لەئیسرائیل.
هێزی ئاسمانی ئیسرائیل بەهاوکاری هەواڵگریی ڕۆژئاوا، چەندین دامەزراوەی ئەتۆمی‌و ژێرخانی سەربازیی‌و بینای سوپای پاسدارانى لەتاران‌و ئه‌سفەهان‌و کرماشان کردە ئامانج.
لەو هێرشانەدا کەسایەتییە پلە باڵاکانی وەک ژەنەڕاڵ حسێن سەلامی (فەرماندەی گشتیی سوپای پاسداران)، ئەمیر عەلی حاجی زادە (فەرماندەی هێزی ئاسمانی سوپای پاسداران)، محەمەد باقری (سەرۆکی ئەرکانی گشتیی هێزە چەکدارەکان)و فه‌ره‌یدون عەباسی (زانای ئەتۆمی) کوژران.
هەندێک لەشرۆڤەکاران ئەم هێرشەیان بەراوردکردوە بەتیرۆرکردنی قاسم سولەیمانی، لەڕوی ئاستی ئامانجەکانی‌و لێکەوتە ناوچەییەکانی.
تەنها چەند کاتژمێرێک دوای هێرشه سه‌ره‌تاییه‌كانى ئیسرائیل، ئێران بەهەڵدانی سەدان موشەکی بالیستیک‌و فڕۆکەی بێفڕۆکەوانی خۆکوژ بەرەو خاکی ئیسرائیل دەستیپێکرد.
هەرچەندە سیستەمی گۆمەزی ئاسنین ڕێگریی لەزۆرێک لەموشەکەکان کرد، بەڵام ژماره‌یه‌ك موشه‌كى دیكه بەر بنکە سەربازییەکانی تەلئەڤیڤ‌و حەیفا کەوتن.
تەندروستیی ئێران دەڵێت، لەسەرەتای هێرشی ئیسرائیلەوە 800 کەس وەک بریندار چونەتە نەخۆشخانەکان کە زۆربەیان ژن‌و منداڵ بونه، به‌ڵام تەندروستی ئیسرائیل وتویه‌تى، 13 کەس گیانیان لەدەستداوەو زیاتر لە 400 کەسیش برینداربون کە بەشێکیان خەڵکی سڤیل بون.
دوابەدوای پەرەسەندنی ململانێکان، وڵاتانی ئەوروپاو ئەمریکا داوای ڕاگرتنی دەستبەجێی ئۆپەراسیۆنە سەربازییەکانیان کرد، هاوکات (ناتۆ)یش باری نائاسایی ڕاگەیاندوه.
لەلایەکی دیکەوە گروپەکانی وەک حزبوڵڵای لوبنان‌و حوسییەکانی یەمەنیش هەڕەشەی چونە ناو شەڕەکەیان کردوە.
میدیا جیهانیەکان شیکاری دەکەن کە ئەم شەڕە دەتوانێت تەنها پریشکێک بێت بۆ شەڕێکی ناوچەیی بەبونی ئەکتەرە نا دەوڵەتی‌و تەنانەت دەوڵەتییەکانیش.
بەلەبەرچاوگرتنی قوربانییە قورسەکانی ئێران، پێدەچێت تاران بەدوای تۆڵەسەندنەوەدا بگەڕێت، بەڵام بەشێوەیەکی کۆنترۆڵکراو بۆ ئەوەی شەڕێکی تەواو ڕونەدات.
ئیسرائیل چەندینجار جەختی لەسەر "مافی بەرگریکردن لەخۆی" کردوەتەوە، بەردەوامە لەپێداگریی لەسەر هێرشە ئامانجدارەکان، بەڵام ڕەنگە جموجۆڵی کەشتیەکانی ئەمریکا لەکەنداوی فارس‌و فشاره سیاسییە نێودەوڵەتییەکان، ڕێگه بۆ ئاگربەستێکی سنوردار خۆشبکات، بەڵام تائێستا هیچ نیشانەیەکی کەمبونەوەی گرژییەکان نییە.
