شارپرێس:
هەسەدە ئاشكرایكرد، هێرشێکی گروپە چەکدارەکانی سەر بەحکومەتی دیمەشقیان لەڕۆژهەڵاتی ڕەققە تێکشکاندوەو وه‌ڵامێكى توندیان داونه‌ته‌وه.
ناوەندی ڕاگەیاندنی هێزەکانی سوریای دیموکرات (هەسەدە) ڕاگەیەندراوێکی بڵاو کردوەتەوەو ڕایگەیاند، گروپە چەکدارەکانی سەر ب حکومەتی دیمەشق لەمیحوەری غانم عەلی لەدەوروبەری ڕۆژهەڵاتی ڕەققە، هێرشێکی نوێیان کردوەتە سەر هێزەکانیان ک تێیدا فڕۆکەی بێفڕۆکەوان و چەکی قورسیان بەکارهێناوە، بەبێ هیچ ڕەچاوکردنێکی سەلامەتیی هاوڵاتییانی مەدەنی و سەقامگیریی ناوچەکە.
هەسەدە دەشڵێت، هێزەکانمان بەوپەڕی بەرپرسیارێتی و تواناوە، بەسەرکەوتویی هێرشەکانیان تێکشکاندوە، هاوکات ل ئەنجامی پێکدادانەکاندا سێ کەس بریندار بون و گروپەکەش قوربانی داوە.
لەڕاگەیەندراوەکەدا هەسەدە هۆشداری داوە کە وەڵامی ئەو هێرشانە دەدەنەوەو ڕایگەیاند، وەڵامی هێزەکانمان هاوتای هێرشەکان بوو، بەڵام بەپابەندبونی تەواوەوە بە ددانبەخۆداگرتن و ڕێگریکردن لەهەر جۆرە فراوانبونێکی شەڕەکە.
لەدرێژەی ڕاگەیەندراوەكەدا ئەوەش هاتوە، كەبە ڕونی ڕایدەگەیەنین لەبەرانبەر هێرش و ئاژاوەگێڕییە دوبارەکاندا دەستەوەستان ناوەستین و ڕێوشوێنی پێویست دەگرینە بەر بۆ پاراستنی ناوچەکانمان، هێزەکانمان و گەلەکەمان لەهەر هەڕەشەیەک.
باسی لەوەشکردوە ئەم ڕەفتارە بێباکانەیە، ئەو گروپە چەکدارانە ناوچەکە بەرەوە گرژیی زیاتر ڕادەکێشێت و هەموو هەوڵەکان بۆ پاراستنی سەقامگیری ناوچەکە تێک دەدات.
هەسەدە لەڕاگەیەندراوەکەدا داوا لەو لایەنانەی پشتیوانیی ئەم گروپانە دەکەن، کۆنترۆڵییان بکەن و کۆتایی بەکردەوە نابەرپرسیارانەکانیان بهێنن، چونکە ئەوان هەڕەشەیەکی ڕاستەوخۆن بۆ سەر ئاسایش و سەقامگیری لەتەواوی ناوچەکەدا.
