شارپرێس:

نوسینەگەی سەرۆکی حکومەتی هەرێمی کوردستان ڕاگەیەنراوێکی لەبارەی دەستدرێژی کردنە سەر گۆڕستانی مەسیحییەکان لە کۆیە بڵاوکردەوە.

نوسینەگەی سەرۆکی حکومەتی هەرێمی کوردستان لەڕاگەیەنراوێکدا دەڵێت،" بە توندترین شێوە سەرکۆنەی ئەو کارە نابەجێ و تێکدەرانە دەکەین کە لە قەزای کۆیە دژی چەند گۆڕێکی خوشک و برا کریستیانەکان کراوە، ئەم کردەوەیە، بە هەموو شێوەیەک شەرمەزار دەکەین و داواش لە  دامودەزگاکانی حکومەت دەکەین کە دەستبەجێ لێکۆڵینەوەی پێویست بکەن بۆ دۆزینەوەی تاوانباران و سزادانیان ".

ئەوەشخراوەتەڕوو،" گۆڕستانەکە لە سەر فەرمانی سەرۆکی حکومەتی هەرێمی کوردستان نۆژەن دەکرێتەوە ".

نوسینگەی سەرۆکی حکومەت باسی لەوەشکرد،" کریستیانەکان پێکهاتەیەکی ڕەسەنی کوردستانن و هەرێمی کوردستان وەک هەمیشە، مەڵبەند و نمونەیەکی گەشی بەیەکەوەژیانی ئاشتییانە و تەبایی نێوان گشت پێکهاتەکان بوە و ڕێگەش بە هیچ کەسێک نادەین ئەو دۆخە تێک بدات  ".