شارپرێس:

بەرپرسانی ئەمریکا ئاشکرایان کرد کە واشنتن ڕێگری لە گواستنەوەی نزیکەی 500 ملیۆن دۆلاری داهاتی نەوتی عێراق بۆ بەغدا کردووە، ئەمەش بە ئاماژەدان بە هەوڵەکان بۆ دروستکردنی فشار بۆ هەڵوەشاندنەوەی گروپە لایەنگرەکانی ئێران، بەگوێرەی ڕۆژنامەی وۆڵستریت جۆڕناڵ.

شارەزای دارایی و بەڕێوەبەری پێشووی بانکی ناوەندی عێراق، مەحمود داغر، ئەمڕۆ چوارشەممە ڕایگەیاند تا ئێستا هیچ ڕاگەیاندنێکی فەرمی سەبارەت بە ڕاگرتنی ناردنی دۆلار بۆ عێراق نەبووە، ئاماژەی بەوەشکرد، ئەوەی لە هەندێک لە دەزگاکانی ڕاگەیاندن بڵاودەکرێتەوە لەسەر بنەمای سەرچاوە فەرمییەکان نییە.

داغر ڕایگەیاند، "بانکی ناوەندی عێراق و حکومەت ڕەتیانکردۆتەوە هیچ بڕیارێکی لەو جۆرە هەبێت و ماڵپەڕی وەزارەتی گەنجینەی ئەمریکاش هیچ زانیارییەکی تێدا نییە کە ئەوە پشتڕاست بکاتەوە".

ڕوونیشیکردەوە، "ئەوەی بڵاودەکرێتەوە هەوڵێکە لەلایەن هەندێک لایەنەوە بۆ قۆستنەوەی دۆخەکە لەکاتی پرۆسەی پێکهێنانی حکومەتدا".

داغر زیاتر وتی، ڕەنگە ئەم هەواڵە کاریگەری دەروونی لەسەر ڕای گشتی هەبێت، بەڵام تا ئێستا هیچ گۆڕانکارییەکی گەورەی لە نرخی دۆلاردا دروست نەکردووە، بەو پێیەی هەڵاوسانی ئێستا ئاساییە و زۆر لە کاریگەرییەکانی گرژی و شەڕەکان دەچێت.

داغر ڕوونی کردەوە کە "ئەو بارە نەختینەیانەی لە ئەمریکاوە بە فڕۆکە دەگەن، تەنیا نزیکەی 7%ی کۆی پێویستی ڕۆژانەی دۆلاری عێراق پێکدەهێنن"، ئاماژەی بەوەشکرد "زۆرینەی خواستەکان لە ڕێگەی گواستنەوەی دارایی هاوردەکردن و سیستەمی بانکییەوە دابیندەکرێت".

هەروەها ئاماژەی بەوەشکرد، "هێشتا دۆلار بەردەستە"، جەختیشیکردەوە "دۆخی دارایی تاڕادەیەک سەقامگیرە سەرەڕای بارودۆخی ئێستای پەیوەست بە ململانێکان، و هێشتا هیچ کاردانەوەیەکی بەرچاو لە بازاڕدا دەرنەکەوتووە".

ڕۆژنامەی وۆڵ ستریت جۆرناڵ لە زاری وەزارەتی دەرەوەی ئەمریکاوە پێشبینییەکانی واشنتۆنی پشتڕاستکردەوە کە عێراق هەنگاوی کۆنکرێتی بۆ هەڵوەشاندنەوەی گروپە چەکدارەکان دەگرێتەبەر، جەختیشی لەوە کردەوە کە "شکستهێنان"ی بەغدا لە ڕێگریکردن لە هێرشەکان کە بەرژەوەندییەکانی ئەمریکا و هاوپەیمانەکانی لە ناوچەکە دەکاتە ئامانج، سێبەرێکی نەرێنی دەخاتە سەر پەیوەندییە دووقۆڵییەکانی نێوان هەردوو وڵات.