شارپرێس:
دۆناڵد ترەمپ، سەرۆکی ئەمریکا دوێنی پێنچشەممە ئاماژەی بە ئەگەری گۆڕانکاریی ڕیشەیی لە نەخشەی سەربازیی ئەمریکا لە ئەوروپا کرد، ئەم هەنگاوەژ وڵاتانی وەک ئەڵمانیا، ئیتاڵیا و ئیسپانیا دەگرێتەوە و پرسیارێکی زۆر لەسەر داهاتووی ئاسایشی کیشوەرەکە و هاوسەنگییە نێودەوڵەتییەکان درووست دەکات.

 
 ئەم بڕیارە لە کاتێکدایە کە گرژییەکان لەگەڵ ئێران و ململانێ سیاسییەکان لەگەڵ سەرکردە ئەوروپییەکان، بەتایبەت "فرێدریش مێرتس"ی ڕاوێژکاری ئەڵمانیا، گەیشتوونەتە لووتکە.

بەپێی ئامارەکانی کۆتایی ساڵی 2025، ئەمریکا نزیکەی 68,064 سەربازی لە ئەرکی چالاکدا لە ئەوروپا هەیە. ئەم هێزانە لە 31 بنکەی هەمیشەیی و 19 پێگەی سەربازیی جیاوازدا جێگیر کراون. 

فەرماندەیی ئەوروپای ئەمریکا (USEUCOM) کە بنکە سەرەکییەکانی لە ئەڵمانیا و ئیتاڵیایە، ئەرکی هەماهەنگیی لەگەڵ ناتۆ و بەڕێوەبردنی ئۆپەراسیۆنەکان لە ئەوروپا و ئەفریقای لە ئەستۆیە.

ئەڵمانیا بە میوانداریکردنی 36,436 سەرباز، یەکەم وڵاتی ئەوروپی و دووەم وڵاتی جیهانە (دوای ژاپۆن) کە زۆرترین هێزی ئەمریکی لێیە. ئەگەر ژمارەی مەدەنییەکان و خێزانەکانیان هەژمار بکرێت، کۆی گشتیی دەگاتە سەرووی 50,000 کەس.

 لەم وڵاتەدا، بنکەی "بافاریا" لە جرافینفور وەک گەورەترین ناوەندی مەشقی سەربازیی ئەمریکا لە دەرەوەی وڵات دەناسرێت. هەروەها ئەڵمانیا میوانداریی نزیکەی 10 بۆ 20 کڵاوەی ئەتۆمیی جۆری B61 دەکات لە چوارچێوەی چەتری ئەتۆمی ناتۆدا.

ئیتاڵیا پێگەیەکی ستراتیژیی گرنگی هەیە و 12,662 سەربازی ئەمریکی لێیە کە لە بنکەکانی وەک ڤیچێنزا، ئەڤیانۆ و سیسیلیا دابەشبوون. لە بەریتانیاش 10,156 سەرباز هەن کە زۆربەیان سەر بە هێزی ئاسمانیین و لە سێ بنکەی سەرەکییدا جێگیر کراون.

لە ئیسپانیا 3,814 سەرباز لە نزیک گەرووی جەبەل تاریق جێگیرن،  سەبارەت بە ڕۆژهەڵاتی ئەوروپا، پۆڵەندا تەنها 369 سەربازی هەمیشەیی هەیە، بەڵام نزیکەی 10,000 سەربازی تری بە شێوەی خولی (دوری) تێدا جێگیر کراوە بۆ مەبەستی بەرپەرچدانەوەی هەڕەشەکان.

 لە ڕۆمانیا 153 سەرباز و لە هەنگاریا 77 سەربازی هەمیشەیی هەن، جگە لەو هێزانەی بۆ مەشق و ڕاهێنان بە شێوەی کاتی دەچنە ئەو وڵاتانە.

ئەم لێدوانانەی ترەمپ نیشانەی گۆڕانکاریی لە ستراتیژی "پاراستنی بێ بەرامبەر"ی ئەوروپایە، کەمکردنەوەی هێزەکان لە ناوچە هەستیارەکانی وەک ئەڵمانیا و ئیتاڵیا دەکرێت ببێتە هۆی لاوازبوونی هەماهەنگییەکانی ناتۆ و گۆڕینی هاوکێشە ئەمنییەکان لە بەرانبەر ڕکابەرە نێودەوڵەتییەکاندا، بەتایبەت لە کاتێکدا کە جیهان بەدەست قەیرانە سیاسی و سەربازییەکانەوە دەتلێتەوە.