شارپرێس:
دوو سەرچاوەی ئاگادار بە تۆڕی هەواڵی "سی ئێن ئێن"یان ڕاگەیاندووە کە دان کین، سەرۆکی ئەرکانی سوپای ئەمریکا، کۆتایی مانگی ڕابردوو گەشتێکی نهێنیی و بەپەلەی بۆ بارەگای فەرماندەیی ناوەندی (سێنتکۆم) لە ویلایەتی فلۆریدا ئەنجامداوە.

 مەبەستی ئەم سەردانە ئاگاداربوون بووە لە پلانەکانی سوپا بۆ ڕەوانەکردنی هێزی وشکانیی بۆ ناو خاکی ئێران بە ئامانجی دەستبەسەرداگرتنی یۆرانیۆمی پیتێنراو کە پێکهاتەی سەرەکییە بۆ دروستکردنی چەکی ئەتۆمی.

بەپێی زانیارییەکانی ئەو سەرچاوانە، گرنگی و هەستیاریی پلانەکە گەیشتۆتە ئاستێک کە کین بە پەلە لە کۆبوونەوەی بەرپرسانی ناتۆ لە برۆکسل گەڕاوەتەوە و لە 19ی ئایاردا گەیشتووەتە تامپا.

 ئەم هەنگاوە دەریدەخات کە ئیدارەی ئەمریکا تا چەند لە بڕیاری دەستپێکردنی ئۆپەراسیۆنێکی سەربازیی مەترسیدار نزیک بووەتەوە. هەرچەندە وتەبێژی ئەرکانی هاوبەش ڕەتیکردۆتەوە لێدوان لەسەر ئامادەکارییەکان بدات، بەڵام سەرچاوەکان دەڵێن کین بژاردەکانی خستۆتە بەردەم دۆناڵد ترەمپ.

سەرەڕای وردیی پلانەکان، ترەمپ بڕیاریداوە پلانەکە ڕابگرێت دوای ئەوەی هۆشداری پێدراوە کە ڕەنگە ئەمە ببێتە هۆی پەرچەکردنی توندی ئێران و هەڵگیرسانی جەنگێکی درێژخایەن کە زیان بە ئابووریی جیهان دەگەیەنێت و قوربانییەکی زۆر لە ڕیزەکانی سوپای ئەمریکا دەخاتەوە.

 ئەم جموجۆڵە سەربازییانە لە کاتێکدایە کە ترەمپ لە لێدوانە گشتییەکانیدا باس لە نزیکبوونەوەی ڕێککەوتن بۆ کردنەوەی گەرووی هورمز و کۆتاییهێنان بە قەیرانی ئەتۆمی دەکات و پێشبینی دەکات لە ماوەی کۆتایی هەفتەدا ڕێککەوتنەکە واژۆ بکرێت، لە کاتێکدا دۆسیەی یۆرانیۆم وەک ئاڵۆزترین بەربەستی بەردەم دانوستانەکان ماوەتەوە.