شارپرێس:
ئهنجومهنى هاریکاریی وڵاتانى کەنداو بەتوندی بەرپەرچی کەمپینە میدیاییەكانى ئەمریکا دەداتەوەو ئەمینداری گشتیی ئهنجومهنهكه ڕاپۆرتەکانی واشنتۆن پۆستو بلومبێرگ دژی ئیماراتو قەتەر بەبێبنەماو ناڕاست ناوبردو دهڵێت، "تۆمەتبارکردنی ئهو دوو وڵاته بەتێکدانی بازاڕی وزە یان پەلکێشکردنی ناوچەکە بۆ شەڕ، تەنها هەوڵێکی نەزۆکە بۆ شێواندنی ڕۆڵی دیپلۆماسیو یەکڕیزیی پۆڵاینی دەوڵەتانی کەنداو".
ئهنجومهنى هاریکاریی کەنداو بەتوندی وەڵامی ئەو کەمپینە میدیاییانه دەداتەوە کە دژی دەوڵەتانی ئیماراتو قەتەر بەڕێوەدەچن؛ جاسم بەدیوی ئەمینداری گشتیی ئهنجومهنهكه دهڵێت، "ئەو تۆمەتو دەنگۆیانە دورن لەڕاستیهوهو بهئامانجی گومانخستنەسەر ڕۆڵی مێژوییو دیپلۆماسیی ئەم دوو وڵاتەیە لەپاراستنی ئاسایشو جێگیرکردنی ئارامیی لەناوچەکەدا".
جاسم بەدیوی ئەمینداری گشتیی ئهنجومهنهكه پەیامێکی بڵاوكردهوهو جهختیكردهوه، "ڕێگە بەهیچ جۆرە هێرشێکی ڕاگەیاندنی نادرێت دژی پێگەی دیپلۆماسیی دەوڵەتانی کەنداو".
ئهوهشى وت، "ئەو زانیارییو دەنگۆیانەی بڵاودەکرێنەوە، هیچ باوەڕپێکراونینو بنەمایەکی بابەتییان نییە، ئامانجی ئەم کەمپینانە تەنها لاوازکردنی ئەو هەوڵە دڵسۆزانەیە کە بۆ چەسپاندنی ئاشتییو دیالۆگ لەناوچەکەدا دەدرێن".
تیشى، "ئیماراتو قەتەر نمونەی پێشەنگی دیپلۆماسین، لەساڵانی ڕابردوشدا بەکردەیی سەلماندویانە کە هێمای ئارامین، ڕۆڵی بەرچاویان هەبوە لەنزیککردنەوەی دیدگا جیاوازەکان، پشتگیریکردنی هەوڵە دیپلۆماسییەکانو چارەسەرکردنی قەیرانە نێودەوڵەتییەکان".
بەدیوی بەتوندی ڕایگەیاند، "ئهنجومهنى هاریكاریى وڵاتانى کەنداو بەشێوەیەکی بڕیاردەرانە دژی هەر هەوڵێک دەوەستێتەوە کە بیەوێت ناوو ناوبانگی هەر ئەندامێکی ئهنجومهنهكه بزڕێنێت، ئەم کەمپینە میدیاییانە ناتوانن کاربکەنەسەر تەباییو یەکگرتویی تۆکمەی نێوان وڵاتانی کەنداو".
ئهنجومهنى هاریکاریی کەنداو دوپاتیدەکاتەوە، "بەشێوەیەکی جێگیر بەردەوامدەبێت لەسەر بەدیهێنانی گەشەپێدان، ئاسایشو خۆشگوزەرانی بۆ گەلانی ناوچەکەو جیهانو بەردەوامدەبێت لەگێڕانی ڕۆڵە میحوەرەییەکەی خۆی بەبێ ئاوڕدانەوە لەمجۆرە هێرشە لاوەکییانە".
ڕۆژنامەی واشنتۆن پۆستی ئەمریکی ڕاپۆرتێکی بڵاوکردوهتهوهو قەتەری تۆمەتبارکردوه بەوەی، بڕیارەکانی لەسەر بەرهەمهێنانو هەناردەکردنی غازو وزە، لەگەڵ ئێراندا هەماهەنگی پێدەکرێت بۆ ئەوەی کاریگەریی لەسەر ڕوداوە سیاسییەکانی ناوچەکە دروستبکەن.
ههروهك لهلایهن میدیاى ئهمریكى-یهوه ئهو دوو وڵاته تۆمەتبارکراون بەوەی، قەتەر قەبارەی زیانەکانی سەر کێڵگەی غازی "ڕەس لافان" (کە بەهۆی هێرشە موشەکییەکانی پێشوی ئێرانەوە بەرکەوتبوو) گەورە کردوەتەوەو وەک پاساوێک بەکاریهێناوە بۆ ڕاگرتنی گرێبەستە نێودەوڵەتییەکانی غازی سروشتی، (بەڵام نوسینگەی ڕاگەیاندنی نێودەوڵەتیی قەتەر ڕایگەیاند کە ڕاگرتنی کارەکان تەنها بۆ پاراستنی گیانی کارمەندان بوە لەکاتی شەڕدا).
لاى خۆیشیهوه ئاژانسی بلومبێرگی ئەمریکی لەڕاپۆرتێکدا ئاماژەی بەوەکردوه، شێخ محەمەد بن زاید (سەرۆکی ئیمارات) داوای لەشێخ محەمەد بن سەلمان (شازادەی جێنشینی سعودیە) کردوە، بەشداریی بکات لەهێرشێکی سەربازیی هاوبەش دژی ئێران، بەڵام سعودیە ئەو داوایەی ڕەتکردوەتەوە.
هەروەها لەهەندێک میدیای دیكهى ئهمریكیدا دەنگۆی ئەوە بڵاوکرابوەوە، ئیمارات ئاسانکاریی کردوە بۆ گواستنەوەی بڕە پارەی گەورە بۆ ناو ئێران کە دواتر لەلایەن بەرپرسانی ئەبوزەبییەوە بەفەرمی ڕەتکرایەوە، جاسم بەدیوی ئەمینداری گشتیی ئهنجومهنهكهى كهنداویش جەختیکردەوە، "ئەم دهنگۆیانه تهنها میدییایینو هیچ بنهمایهكیان نییهو ئامانجی سەرەکییش تەنها تێکدانی یەکڕیزیی وڵاتانی کەنداو، تێکدانی نێوەندگیرییەکانی قەتەرو شێواندنی ئەو نمونە سەرکەوتوەیە کە ئیماراتو قەتەر لەساڵانی ڕابردودا بۆ جێگیرکردنی ئارامیو دیپلۆماسی لەڕۆژهەڵاتی ناوەڕاست پێشکەشیانکردوە".
