شارپرێس:
سەرچاوەیەکی بەرپرسی سعودیە ڕایگەیاند، هێرشە ئاسمانییەکەی چەند رۆژی رابردوو، تواناکانی ئەو گروپە چەکدارییانەی عێراقی کردۆتە ئامانج کە لایەنگری ئێرانن و هەڕەشەیان لە ئاسایشی سعودیە کردوە و هێرشیان کردۆتە سەر دامەزراوە مەدەنیی و ئابورییە گرنگەکانی.

وەزارەتی بەرگریی سعودیە ڕۆژی چوارشەممە ڕایگەیاندبوو، بە هەماهەنگیی لەگەڵ فەرماندەیی ناوەندیی ئەمریکا، هێرشی چڕ و دیاریکراویان کردۆتە سەر ئامانجگەلێکی سەر بە میلیشیاکان لەسەر خاکی عێراق، کە پەیوەندییان بە بەئامانجگرتنی دامەزراوە نەوتییەکانی سعودیەوە هەبوە.

سەرچاوەکە لەچاوپێکەوتنێکدا لەگەڵ "رۆژنامەی شەرقولئەوست" پەرۆشیی سعودیەی بۆ پەیوەندییەکانی لەگەڵ حکومەت و گەلی عێراق کردەوە و بەڵام جەختی کردەوە کە هێرشەکە ئاڕاستەی ئەوان نەکراوە، بەڵکو وەڵامێکی ورد و سنوردار بوە دوای تەواوبونی سەرجەم ڕێکارە دیپلۆماسی و سیاسییەکان و گرتنەبەری ئەوپەڕی دانبەخۆداگرتن لە مانگەکانی ڕابردودا.

ئەو بەرپرسە ئاماژەی بەوەداوە وەڵامدانەوەکە تەنیا کۆگا سەربازییەکانی ئەو میلیشیانەی گرتۆتەوە کە زیان بە بەرژەوەندییەکانی عێراق دەگەیەنن و خاکەکەی دەکەنە ئامرازێک بۆ دەستدرێژیکردنە سەر وڵاتانی دراوسێ.

ئاکۆ عەبدوڵڵا ئاڵی