شارپرێس:

توێژینەوە نوێکان لەبارەی نەخۆشیی شەکرەوە زەنگێکی ئاگادارکردنەوەی جدی لێدەدەن؛ چونکە نەخۆشی شەکرەی جۆری 2 چیتر تەنیا تایبەت نییە بە کەسانی بەساڵاچوو، بەڵکو بە شێوەیەکی نیگەرانکەر لەنێوان گەنجان و بەتایبەت ژنانی ژێر تەمەنی 40 ساڵدا ڕوو لە زیادبوونە. 

بەپێی داتاکانی بەریتانیا و ئەڵمانیا، گۆڕانی شێوازی ژیان و زۆربوونی کێش هۆکاری سەرەکین، بەجۆرێک لە ئەڵمانیا لەنێوان ساڵانی 2014 بۆ 2023 ساڵانە بە ڕێژەی 5.8% تووشبوون لەنێوان مێردمنداڵاندا زیادی کردووە. 

ئەوەی بابەتەکە مەترسیدارتر دەکات ئەوەیە کە تووشبوونی گەنجان بەم نەخۆشییە دەبێتە هۆی دەرکەوتنی نیشانەی توندتر و مەترسیی لێکەوتە تەندروستییەکان و کورتبوونەوەی تەمەنی پێشبینیکراو زیاتر دەکات.

بۆ ڕێگری لە تەشەنەسەندنی ئەم نەخۆشییە و پاراستنی گەنجان، شارەزایان جەخت لەسەر ئەنجامدانی دەستوەردانی پێشوەختە و گۆڕینی ڕیشەیی لە شێوازی ژیاندا دەکەنەوە. 

ڕێگەی سەرەکی بۆ خۆپاراستن لە ڕێگەی پەیڕەوکردنی سیستەمێکی خۆراکیی تەندروستەوە دەبێت کە دوور بێت لە شەکری دەستکرد و خۆراکە ئامادەکراوەکان، لەگەڵ زیادکردنی چالاکیی جەستەیی ڕۆژانە. 

لە لایەکی ترەوە، توێژەران داوا دەکەن ژینگەیەکی لەبارتر بۆ گەنجان دابین بکرێت، وەک فەراهەمکردنی شوێنی ئارام بۆ وەرزشکردنی ژنان، دابینکردنی خۆراکی تەندروست لە قوتابخانەکاندا، و خستنەگەڕی یاسای وەرزشیی ڕۆژانە بۆ خوێندکاران. 

ئاکۆ عەبدوڵڵا ئاڵی