شارپرێس:

دوای هەڵوەشاندنەوەی هێزەکانی سوریای دیموکرات (هەسەدە) و تێکەڵبونیان لەگەڵ سوپای سوریا، جارێکی دیکە پرسی کشانەوەی هێزەکانی تورکیا لەهەرێمی کوردستان و چۆڵکردنی بنکە سەربازییەکانی لەناوچە سنورییەکان هاتەوە بەرباس، چاودێرانی سیاسی و شارەزایانیش پێشبینی دەکەن لەکۆتایی ئەمساڵەوە تورکیا بەچەند قۆناغێک دەست بە کشانەوەی هێزەکانی بکات.

لە ساڵی 1984وە پەکەکە دەستی بە خەباتی چەکداری لەدژی دەوڵەتی تورکیا کرد، بەپێی ئامارەکان، لە ماوەی زیاتر لە چوار دەیەی شەڕی نێوان پەکەکە و دەوڵەتی تورکیا، زیاتر لە 40 هەزار کەس شەهیدبون، یاخود کوژراون.

-بەغدا و ئەنقەرە کشانەوەی هێزەکانی تورکیا تاوتوێ دەکەن
کەریم علێوی محەمەداوی، سەرۆکی لیژنەی ئاسایش و بەرگری پەرلەمانی عێراق لەلێدوانێکدا بە ماڵپەڕی "العالم الجديد"ی راگەیاندوە،" پرسی کشانەوەی هێزەکانی تورکیا لەهەرێمی کوردستان بەشێک دەبێت لەدانوستانە ئەمنییەکانی داهاتوی نێوان بەغدا و ئەنقەرە ".

-وەک چۆن ئەمریکا دەکشێتەوە.. دەبێت تورکیا بکشێتەوە
سەرۆکی لیژەی ئاسایش و بەرگری ئەوەشیخستەڕوو، وەک چۆن لە کۆتایی مانگی ئەیلولدا هیچ هێزێکی بیانی لەخاکی عێراق نامێنێت، بەهەمان شێوە دەبێت بونی سەربازی تورکیاش لە وڵاتەکە کۆتایی پێبێت، بەتایبەت کە لەئێستادا پەکەکە چەکی داناوە، بۆیە هیچ بیانویەکی بۆ مانەوەیان لەناو خاکی عێراق و هەرێمی کوردستان نەماوە.

بەگوێرەی ئامارە نافەرمییەکان، تاکو ئێستا دانیشتوانی زیاتر لە 600 گوندی پارێزگای دهۆک بەهۆی تۆپباران و بۆردومانەکانی تورکیا ناوچەکانیان چۆڵکردوەو زیاتر لە 20 هەزار دۆنم زەوی کشتوکاڵی سوتاون.

لە 27ی شوباتی 2025 عەبدوڵا ئۆجەلان رابەری زیندانیکراوی پەکەکە، کۆتاییهێنانی بە خەباتی چەکداری و چەکدانانی پەکەکەی راگەیاند، لە مانگی تەمموزی هەمان ساڵیش لەمەراسیمێکدا لەسنوری قەزای دوکانی سەر بەپارێزگای سلێمانی، بەشێک لە گەریلاکانی پەکەکە وەک نیازپاکییەک بەشێک لەچەکەکانیان سوتاند.

 
-تورکیا ئامادەیە بنکەکانی لەهەرێمی کوردستان چۆڵبکات
هاوکات، جەواد جۆغ، چاودێری سیاسی و شارەزا لەکاروباری تورکیا باسی لەوەکردوە، ئەنقەرە تێڕوانینێکی ئەرێنی لەبارەی پێشهاتە نوێیەکانی ناوچەکەوە هەیە و تورکیا ئامادەیە خاکی عێراق جێبهێڵێت، بەڵام بەمزوانە نا.

بەپێی وتەی ئەو چاودێری سیاسییە، هێزەکانی تورکیا پێویستیان بە هەماهەنگی هەواڵگیرییە لەگەڵ عێراق، لە یەکەم کۆبونەوەی داهاتوی نێوان هەردولا، پرسی چۆڵکردنی بنکە سەربازییەکان تاوتوێدەکرێت.

جەواد جۆغ کە چاودێرێکی سیاسییە، دەشڵێت،" لەئێستادا ئامادەکاری دەکرێت بۆ ئەوەی پەکەکە چەکەکانی رادەستی تورکیا بکات، دوای ئەو هەنگاوە سوپای تورکیا بە چەند قۆناغێک دەست بە کشانەوە دەکات و ئەنقەرە هیچ نییەتێکی نییە بۆ ئەوەی بنکەکانی لەهەرێمی کوردستان بهێڵێتەوە، ئەوەی هەیە تورکیا تەنها پێویستی بە هەماهەنگی هەواڵگیریە لەگەڵ دەزگا ئەمنییەکانی عێراق بۆ ئەوەی ئاسایشی سنوری خۆی پارێزراو بکات.