پەرلەمانتاران و بەرپرسان بە لێدوانە توند و دژ بە یەکەکانیان دۆخێکی دەرونی خراپیان بۆ هاوڵاتیان دروستکردوە

ڕاپۆرت

19/11/2020‌ 759 جار خوێندراوه‌ته‌وه

شارپرێس:

هەرکاتێک قەیرانێکی سیاسی یان ئابوری، ڕو لە هەرێمی کوردستان دەکات، یاخود ئەو کاتەی کێشە سیاسییەکان لە نێوان حزبەکاندا نوێ دەبێتەوە، ئیدی سۆشیال میدیا و کەناڵە تەلەفزیۆنییەکان دەبنە کەرەستەی ماندوکردنی خەڵک و بەشێکی زۆر لە هاوڵاتیان سەرقاڵ دەکرێن بە ململانێ لاوەکی و تەنانەت شەخسییەکانیشەوە.

کادر و ئەندامە حزبییەکان لە کاتی ململانێکاندا، لە ژێر ناوی پەرلەمانتار و چاودێری سیاسی و زۆر جاریش مامۆستای زانکۆ و چەندین ناو و ناونیشانی جیاوازدا، دەردەکەون و بە زمانێکی ئاست نزم لەبارەی نەیاری حزبەکانیانەوە دەدوێن و ململانێکانیان دەبەنە ئاستێک، کە دەرونی هاوڵاتیانیش ماندوو دەکەن.

لە کاتێکدا هەرێمی کوردستان ماوەی شەش ساڵە بە دۆخێکی ئابوری و سیاسی سەختدا تێدەپەڕێت و هاوڵاتیانیش زەرەمەندی یەکەمی ئەو دۆخەن، کەچی بەشێکی زۆر لە پەرلەمانتاران و بەرپرسانی حیزبی و حکومی، هەر جارە و لە بارەی بابەتێکی دیاریکراوەوە، دەکەونە ململانێیەکی توندی ناجۆرەوە، تەنانەت خۆیان وەک داکۆکیکار لە مافەکانی هاوڵاتیانی هەرێم و تەنانەت دیموکراسی و یاسا لەقەڵەم دەدەن و وەک پاڵەوانێکی ڕزگارکەر نمایش دەکەن، تاوەکو ئێستاش بێجگە لە ماندوکردنی دەرونی خەڵک، شتێکی ئەوتۆیان لەبارەی ژیانی هاوڵاتیانەوە نەگۆڕیوە.

بەشێک لە هاوڵاتیان زۆر دەرکەوتنی بەرپرسەکان لە کاتی قەیران و کێشەکاندا، بە هەوڵێک بۆ خۆدزینەوەیە لە بەرپرسیارێتی دەزانن و پێیان وایە بۆ ڕاکێشانی هەست و سۆزی هاوڵاتیانە، ئەوەش لە پێناو ئەوەی هەر لایەنە و ئەوی تر تۆمەتبار بکات بە هۆکاری کەموکورتی و کێشەکان.

ئەو ململانێیەی لە نێوان پەرلەمانتاران و بەرپرسە حزبی و حکومیەکاندا هەیە، تاوەکو ئێستا نەک هیچی لە دۆخی خراپی هەرێم نەگۆریوە، بەڵکو بە پێچەوانەشەوە، کاریگەریی خراپی لەسەر دەرونی خەڵک دروستکردووە و، وەک هاوڵاتیان باسی دەکەن، نازانن بڕوا بە کام بەرپرس و کام لایەن بکەن و دەشڵێن لە سەرەتای هەر هەفتەیەکەوە تاوەکو کۆتاییەکەی، خەڵک بە بابەتێکەوە سەرقاڵ دەکەن و دواتریش هیچ ئەنجامێک بەدەست نایەت.

هەر لە خزمەتگوزارییە سەرەتاییەکانەوە بیگرە، هەتا دەگاتە بڕینی موچەی فەرمانبەران و تەنانەت لە ململانێ سیاسی و ئابورییەکانی نێوان هەرێم و بەغداد، بەشی هەرە زۆری بەرپرسان خۆیان بە فریادڕەسی خەڵک دەزانن و هەر لایەکیان ئەوی دیکە بە هۆکاری شکست و کەموکورتییەکان دەزانێت و هاوڵاتیانیش بونەتە قوربانی و نازانن باوەڕ بە کام بەرپرس یاخود کام فراکسیۆنی پەرلەمان و کام هێزی سیاسی بکەن.