شارپرێس:
وەزارەتی بەرگریی سووریا ڕایگەیاند، هێزەکانی سووریای دیموکرات
(هەسەدە) بە فڕۆکەیەکی بێفڕۆکەوانی خۆکوژ هێرشیان کردووەتە سەر کەتیبەیەکی سوپای
سووریا لە کاتی پشکنینی کارگەیەکدا، ئەمەش بووەتە هۆی تەقینەوەی کارگەکە و کوژرانی 7 سەرباز و برینداربوونی 20ی دیکە.
فەرمانگەی ڕاگەیاندن و پەیوەندییەکانی سەر بە وەزارەتەکە
ئاماژەی بەوە کردووە، هێزەکانی سوپا کارگەیەکی دروستکردنی بۆمبی چێنراو و تەقەمەنی
فڕۆکەی بێفڕۆکەوانیان لە نزیک دەروازەی "یەعریبییە" لە گوندەواری پارێزگای
حەسەکە دۆزیوەتەوە.
هەروەها ئەوەشی خستووەتە ڕوو کە کارگەکە ژمارەیەک فڕۆکەی
بێفڕۆکەوانی دروستکراوی ئێرانی تێدابووە و هێزەکانی "هەسەدە" خەریکی
ئامادەکردنیان بوون بۆ پڕکردنەوەیان بە تەقەمەنی .
وەزارەتی بەرگری جەختی کردۆتەوە کە لە کاتی پشکنینی کارگەکە
لەلایەن سوپاوە، فڕۆکەیەکی بێفڕۆکەوانی خۆکوژ هێزەکانی سوپای کردۆتە ئامانج، کە
بووەتە هۆی کوژران و برینداربوونی ئەو سەربازانە.