شارپرێس:

مەزڵوم عەبدی چارەنوسی دامەزراوە فەرمییەکانی بەڕێوەبەرایەتی خۆسەر ئاشکراکرد و دەڵێت، فەرمانبەران و بەڕێوەبەرە کارگێڕییەکانی بەڕێوەبەرایەتی خۆسەر وەکو خۆیان لەسەر کارەکانیان دەمێننەوە و لانادرێن.

مەزڵوم عەبدی، فەرماندەی هێزەکانی سوریای دیموکرات (هەسەدە) لە وتارێکدا بۆ خەڵکی حەسەکە و ئاوارەکانی عەفرین و سەرێکانی رایگەیاند، بەپێی ڕێککەوتنەکەیان لەگەڵ حکومەتی سوریا، بەڕێوەبەر و فەرمانبەرانی ئیدارەی خۆسەر لە جێگەی خۆیاندا دەمێننەوە.

سەبارەت بە دەروازەی سنوری سێمالکا، مەزڵوم عەبدی باسی لەوەکرد،" سێمالکا وەکو خۆی دەمێنێتەوە، بەڕێوەبەر، فەرمانبەران و ئاسایشەکەی وەکو خۆی دەمێنێتەوە، تەنها تیمێکی سەر بە حکومەتی سوریا لەدەروازەکە جێگیر دەکرێن و ئەوان سەرپەرشتی هەندێک کاروبار دەکەن کە پەیوەستە بە دەوڵەتەوە، وەکو پشکنینی پاسپۆرت".

مەزڵوم عەبدی شێوازی تێکەڵکردنی هێزەکانی هەسەدەی ئاشکراکرد و وتی: "فیرقەیەک کە لە سێ لیوا پێکدێت، لە هێزەکانی هەسەدە دروست دەکرێت، لیوایەک لە حەسەکە، لیوایەک لە قامشلۆ و لیوایەکیش لە دێرک جێگیر دەکرێت."