شارپرێس:

لەکاتێکدا کایەی سیاسیی عێراق لەبەردەم وەرچەرخانێکی هەستیارو چاوەڕوانیی کۆبونەوەیەکی یەکلاکەرەوەدایە، حسێن عەنکوشی پەرلەمانتاری هاوپەیمانی ئاوەدانکردنەوەو گەشەپێدان (به‌سه‌رۆكایه‌تى سودانى)، پەیامێکی هۆشداریدەرو ڕاشکاو ئاراستەی لایەنە سیاسییەکان دەکات‌و داواده‌كات، بەرژەوەندی نیشتمانیی بخه‌نه‌ پێش هه‌ر پرسێكى دیكه‌وه‌.

عەنکوشی لەلێدوانێکی ڕۆژنامەوانیدا ئاماژەی بەوەکرد، پێویستە لەم قۆناغەدا هەموان گوێ بۆ دەنگی ژیریی بگرن کە مەبەست لێی ئەو دەسپێشخەریی‌و ڕوانگانەیە کە لەلایەن سەرۆکی ئەنجومەنی باڵای دادوەرییەوە خراونەتەڕوو، ئەم هەڵوێستەی عەنکوشی وەک هەوڵێک دەبینرێت بۆ گەڕانەوە بۆ چەترێکی یاسایی کە دوربێت لەکێشمەکێشی حزبی.

لەسەر ئاستی بڕیاری سیاسیی، عەنکوشی جەختیکردوه‌ته‌وه‌، "عێراق دەبێت بەسەروەریی خۆی بمێنێتەوەو بڕیارەکانی تەنها لەئیرادەی گەل‌و ناوخۆی وڵاتەوە سەرچاوە بگرن"، هۆشداریده‌دات‌و ڕایده‌گه‌یه‌نێت، "هۆشدارییه‌كى گرنگ هه‌یه‌ ده‌بێت لایەنە سیاسییەکان له‌به‌رچاوى بگرن، ئەگەر بڕیار لەتاران‌و واشنتۆنەوە بێت، سەروەریی‌و دامەزراوەکانی دەوڵەت هەڵدەوەشێنەوە".

ئەم پەیامە لەکاتێکدایە کە ناوەندە سیاسییەکان بەردەوام باس لەکاریگەریی‌و دەستوەردانە دەرەکییەکان دەکەن لەپرۆسەی پێکهێنانی حکومەت‌و بڕیارە چارەنوسسازەکاندا.

یەکێکی دیکە لەتەوەرە سەرەکییەکانی پەیامەکەی عه‌نكوشى، پابەندبونه‌ به‌کاتە دەستورییەکان، چونكه‌ بەبڕوای ئەو پەرلەمانتارە، "تێپەڕاندنی ئەو وادانەی دەستور دیاریکردون، هەڕەشەیە بۆ سەر سەقامگیریی دامەزراوەکانی دەوڵەت‌و دەبێتە هۆی دروستبونی بۆشاییەک کە زیان بەهاوڵاتیان دەگەیەنێت".

ئەم لێدوانانەی عەنکوشی هاوکاتە لەگەڵ بڕیاری چوارچێوەی هەماهەنگی بۆ دواخستنی کۆبونەوەی بڕیارلێدراوی خۆی بۆ ڕۆژی هەینی داهاتوو. شارەزایانیش پێیانوایە، ئەم دواخستنە دەرفەتێکی دیکەیە بۆ پێگەیاندنی لێکتێگەیشتنەکان‌و دۆزینەوەی دەرچەیەک بۆ ئەو دۆسیە ئاڵۆزانەی کە تائێستا لایەنەکان لەسەری ڕێکنەکەوتون.