شارپرێس:

هاوشانی ئەو فشارە سیاسییە چڕانەی لەسەر قەوارەی هەرێمی کوردستان هەن، بڵاوبونەوەی دەنگۆی پلانی حکومەتی عێراق بۆ چەککردنی پێشمەرگە، پەیامێکی هۆشداریی کتوپڕو توندی لەلایەن مەسعود بارزانییەوە لێکەوتەوە؛ بارزانی لەپەیامێکدا ڕوبەڕوی بەغدا ده‌وه‌ستێت‌و هێڵی سوری بەدەوری چەکی پێشمەرگەدا کێشا وەک وەڵامێک بۆ ئەو لێکدانەوە هەڵانەی کە چارەنوس‌و پێگەی دەستوریی ئەم هێزە دەخەنە بەردەم مەترسییەکی ڕاستەقینەوە.

لەکاتێکدا دیمەنی سیاسیی‌و ئەمنیی عێراق بەقۆناغێکی ئێجگار هەستیاردا تێپەڕدەبێت، پرسی كۆكردنه‌وه‌ى چەک لەدەستی دەوڵەتدا بەهۆی فشارێکی چڕی ئەمریکاوە بوەتە هێڵی سوری پەیوەندییەکانی نێوان بەغداو واشنتۆن، به‌گوێره‌ى ڕاپۆرتە دیپلۆماسییەکان، ئیدارەی دۆناڵد ترەمپ هۆشداری توندی داوەتە حکومەتەکەی عەلی زەیدی کە دەبێت سەرجەم گروپە چەکدارەکانی دەرەوەی چوارچێوەی سوپاو هێزە فەرمییەکانی عێراق چەکبکرێن، ئەم بڕیارەش کێشەیەکی قووڵی لێکدانەوەی یاسایی‌و سیاسیی لەنێوان بەغداو هەولێر هێناوەتە ئاراوە.

فشاری توندی ئەمریکا بۆ سەر بەغدا
ئیدارەی واشنتۆن بەفەرمی چوار گروپی چەکداریی سەر بە به‌ره‌ى مقاوه‌كه‌ى ئیسلامی لەعێراق خستوەتە لیستی تیرۆرەوەو ڕایگەیاندوە، چیدی ڕێگە بەمانەوەی هیچ چەکێکی دەرەوەی کۆنتڕۆڵی حکومەت نادات.

هەرچەندە ئامانجی سەرەکی ئەمریکا گروپە شیعییەکانی نزیک لەئێرانە، بەڵام لایەنی کوردی هۆشداریدەدات کە بەغدا دەیەوێت ئەم دەرفەتە بقۆزێتەوە بۆ تێکەڵکردنی کارتەکان‌و دروستکردنی وەزارەتی ئاسایشی فیدراڵی، بەمەبەستی لاوازکردن یان هەڵوەشاندنەوەی پێگەی دەستوریی هێزەکانی پێشمەرگە.

سێبەری تۆم باراک‌و ترسی دوبارەبونەوەی خیانەت
گرژییەکان کاتێک گەیشتنە لوتکە کە دۆناڵد ترەمپ نوێنەری تایبەتی خۆی تۆم باراک-ى بەفەرمی وەک نوێنه‌رى سەرۆکایەتی بۆ عێراق‌و سوریا دەستنیشانکرد، ڕاپۆرتەکان باس لەوەدەکەن، باراک بەمزوانە سەردانێکی فەرمی بۆ بەغدا ئەنجامدەدات بۆ جێبەجێکردنی ئەم نەخشە ڕێگه‌ نوێیە.

ئەم ناوهێنانە شەپۆلێکی توندی نیگەرانی‌و هۆشداریی لای سەرکردایەتی‌و شەقامی کوردی دروستکردوە، کورد ئەزمونێکی زۆر تاڵ‌و برینێکی قووڵی لەگەڵ تۆم باراک‌و سیاسەتەکانی ئیدارەی ترەمپ هەیە لەڕۆژئاوای کوردستان (باکوری ڕۆژهەڵاتی سوریا)؛ کاتێک لەکاتی گۆڕانکارییە سیاسییەکاندا، گەلی کورد لەو بەشە هەستی پێکرد کە واشنتۆن پشتی تێکردن‌و چارەنوسی ناوچەکەی ڕادەستی دیمەشق‌و ئەنكەرە کرد.

چاودێرانی کورد لەئێستاوە هۆشداریدەدەن، ڕەنگە هێنانە پێشەوەی باراک، ئاماژەیەکی مەترسیداربێت بۆ سازشێکی نوێ لەسەر حسابی قەوارەی هەرێمی کوردستان.

هۆشداریی توندی کورد: پێشمەرگە هێڵی سورە
لەوەڵامی ئەم گۆڕانکاریی‌و فشارە دەرونی‌و سیاسییانەدا، پەیامە کتوپڕو توندەکەی مەسعود بارزانی سه‌رۆكى پارتى دیموكراتى كوردستان، ڕێک وەک هۆشدارییەکی پێشوەختەبوو بۆ ڕێگریکردن لەهەر جۆرە پیلانگێڕیه‌ك دژى هه‌رێمى كوردستان‌و هێزى پێشمه‌رگه‌.

بارزانی له‌و په‌یامه‌یدا نوسیویه‌تى، "چەکی پێشمەرگە، پارچەئاسن‌و جبەخانەو ئامرازی شەڕکردن نییە، بەڵکو مێژوو، فیداکاریی، کەرامەت‌و بیروباوەڕیەتی".

بەرپرسانی باڵای هەرێم جەختدەکەنەوە کە جیاوازی ڕەها هه‌یه‌ له‌نێوان میلیشیاکان‌و هێزى پێشمه‌رگه‌دا، چونكه‌ پێشمەرگە به‌گوێره‌ى مادەی 121ى دەستوری عێراق، هێزێکی فەرمیی‌و قەوارەیەکی دەستورییە، نەک گروپێکی چەکداری نافەرمیی.

ده‌شڵێن، "کورد هۆشداریى به‌ئه‌مریكا ده‌دات كه‌ هه‌رگیز ڕێگەنادات دیمەنی ڕۆژئاوای کوردستان لەباشور دوبارەببێتەوەو دەستکاریکردنی چەکی پێشمەرگە هێڵی سورە".

ئایندەیەکی ناڕون
عێراق‌و هەرێمی کوردستان لەبەردەم گۆڕانکارییەکی گەورەدان، گەشتی داهاتوی تۆم باراک بۆ بەغدا دیاریدەکات کە ئایا واشنتۆن دەیەوێت هاوسەنگییەکان بپارێزێت، یان فشارەکانی بۆ سەر بەغدا، دەرگای پێکدادانێکی نوێ لەگەڵ هەولێر دەکاتەوە، چونكه‌ وه‌كو بارزانى جه‌ختده‌كاته‌وه‌، "چەکی پێشمەرگە لای گەلی کورد تەنها ئامراز نییە، بەڵکو قەڵغانی مانەوەیەو هەر جۆرە دەستکارییەک دەبێتە هۆی داڕمانی تەواوی پرۆسەی سیاسی لەناوچەکەدا".