شارپرێس:

"عێراق بەرەو ماڵئاواییکردن لەسەردەمی کاغەزو هەنگاونان بۆ جیهانی دیجیتاڵ ده‌چێت"، ئه‌مه‌ په‌یامى نوێى ڕاوێژکاری سەرۆک وەزیرانی عێراقه‌ بۆ کاروباری دارایی، ده‌شڵێت "پڕۆژەی دیناری دیجیتاڵیی، وەرچەرخانێکی ستراتیژییه‌ بۆ کۆتاییهێنان بەقەیرانە داراییەکان‌و نوێکردنەوەی سیستەمی نەختینه‌یى وڵاته‌".

مەزهەر محەمەد ساڵح ڕاوێژکاری سەرۆک وەزیرانی عێراق بۆ کاروباری دارایی ڕایگەیاند، پڕۆژەی (دیناری دیجیتاڵی) هەنگاوێکی ستراتیژیی گرنگە بۆ پەرەپێدانی سیستەمی دارایی، ئاماژەی بەوەشکرد، ئەم پڕۆژەیە تەنها چارەسەرێکی دابڕاو نییە بۆ قەیرانی نەختینە، بەڵکو بەشێکە لەپرۆسەی گشتگیری چاکسازیی ئابوریی.

ڕاوێژكاره‌كه‌ى زه‌یدیى به‌ئاژانسی هەواڵی عێراقی وتوه‌، "دیناری دیجیتاڵی دراوێکی نوێ نییە، بەڵکو شێوازێکی ئەلیکترۆنیی دیناری عێراقییە کە لەلایەن بانکی ناوەندییەوە دەردەچێت‌و هەمان هێزی یاسایی‌و نرخی دیناری کاغەزی هەیە، ئەم دراوە لەڕێگەی جزدانی دیجیتاڵی‌و هەژمارە بانکییەکانەوە مامەڵەی پێوە دەکرێت".

ڕاوێژکارەکەی سەرۆک وەزیران، چەند سودێکی سەرەکی بۆ ئەم وەرچەرخانە داراییە خستە ڕوو، لەوانە، کەمکردنەوەی خەرجییەکانی چاپی پارە، گواستنەوەو پاراستنی نەختینە، زیادکردنی خێرایی پارەدان‌و گواستنەوەی دارایی، سنوردارکردنی ئابوریی نافەرمی، ڕێگریکردن لەخۆدزینەوە لەباج، سپیکردنەوەی پارەو گەندەڵی دارایی‌و هاندانی هاوڵاتییان بۆ بەکارهێنانی سیستەمی بانکی‌و دیجیتاڵی.

مەزهەر محەمەد ساڵح هۆشداریدا لەوەی، نابێت وەک تاکە چارەسەر بۆ قەیرانی نەختینە سەیری دیناری دیجیتاڵی بکرێت، چونکە قەیرانی نەختینە پەیوەستە بەبنەماکانی ئابوریی وەک (هەیکەلی بودجە، خەرجییەکانی حکومەت‌و متمانەی خەڵک بەبانکه‌كان).

جەختیشیکردەوە، ئەم دراوە تەنها "ئامرازێکە" بۆ باشتر بەڕێوەبردنی پارە، نەک چارەسەرێکی سەربەخۆ بۆ کێشە گەورەکانی ئابوریی.

سەبارەت بەموچەی فەرمانبەران‌و خانەنشینان، ساڵح ئاماژەی بەوەکرد، لەڕوی تەکنیکییەوە ئەمە کارێکی گونجاوە، چونکە ئێستا زۆرینەی موچەکان لەڕێگەی کارتە بانکییەکانەوە دەدرێن.

ئه‌وه‌شى وت، "لەداهاتودا دەکرێت موچەکان ڕاستەوخۆ بخرێنە ناو جزدانە دیجیتاڵییەکان، ئەمەش پێویستی بەده‌ستاوده‌ستكردن‌و گواستنەوەی نەختینە (کاش) ناهێڵێت".

لەکۆتاییدا، ڕاوێژکارەکەی سەرۆک وەزیرانى عێراق جەختیکردەوە، سەرکەوتنی دیناری دیجیتاڵی پێویستی بەچەند مەرجێک هەیە، ئه‌وانیش تەواوکردنی چوارچێوە یاسایی‌و تەشریعییەکان، بەهێزکردنی ئاسایشی سایبەری (پاراستنی ئەلیکترۆنی)، باشترکردنی ژێرخانی ئینتەرنێت‌و پەیوەندییەکان‌و بەرزکردنەوەی ئاستی هۆشیاریی دارایی‌و دیجیتاڵی لای هاوڵاتییان بۆ ئەوەی بەمتمانەوە مامەڵەی پێوەبکەن.

له‌كۆتایی لێدوانه‌كه‌یدا مه‌زهه‌ر محه‌مه‌د ساڵح جه‌ختیكرده‌وه‌، "ئەمە بەشێکە لەهەوڵە جیهانییەکان‌و عێراقیش دەیەوێت لەگەڵ سیستەمی دارایی نوێی جیهان خۆی بگونجێنێت".