شارپرێس:

ئێران داوا لەکۆریای باشور دەکات بەرژەوەندیی‌و ناوبانگی نێودەوڵەتی خۆی نەکاتە قوربانیی "سیاسەتە دوژمنکارییەکانی ئەمریکا"؛ بەرپرسێکی باڵای تاران-یش هۆشداریدەدات کە پاراستنی ئاسایشی ناوچەکە مەحاڵە تائەوکاتەی دەستوەردان‌و گەمارۆ ئابورییەکانی ئەمریکا بەردەوامبن.

بەرپرسێکی باڵای ئەمنی‌و سیاسیی ئێران لەلێدوانێکى ڕۆژنامه‌وانیدا، هۆشدارییەکی توندو بڕیارنەدەر ئاراستەی کۆریای باشور دەکات لەملدان بۆ فشارەکانی ئەمریکا یان بەشداریکردن لەهەر ئۆپەراسیۆنێکی سەربازیی لەگەروی هورمزدا.

ئەو بەرپرسە باڵایە داوای لەسیئۆل کردوە بەرژەوەندیی‌و ناوبانگی خۆی نەکاتە قوربانیی سیاستە دوژمنکارییەکانی ئەمریکا کە دەبنە هۆی تێکدانی ئاسایش‌و سەقامگیریی.

هەروەها ئاماژەی بەوەکردوە، کۆریای باشور باشدەزانێت هۆکاری سەرەکیی ناسەقامگیریی لەگەروی هورمز بۆ دەستدرێژییەکانی ئەمریکاو ئیسرائیل دەگەڕێتەوەو پێویستە ئەم ڕاستییە پشتگوێنەخات.

سەرچاوە ئێرانییەکە جەختیکردەوە، تاران هەر جۆرە تێوەگلانێکی کۆریای باشور دژ بەئێران لەگەروی هورمز، وەک بەشداریی سەربازیی ڕاستەوخۆ لەدەستدرێژیی‌و جەنگ دژ بەوڵاتەکەی هەژمار دەکات.

جه‌ختیكرده‌وه‌، وڵاتەکەی بەهیچ شێوەیەک چاوپۆشی لەهیچ هاوکارییه‌ك ناکات لەو تاوانە دوژمنکارییانەی دەکرێنەسەر گەلی ئێران‌و مافەکانی، ڕاشیگەیاند، "گەڕانەوەی ئاسایش بۆ ناوچەکە مەحاڵە تائەوکاتەی دەستوەردانە نایاساییەکانی ئەمریکاو گەمارۆی ئابوریی‌و جەنگی سەپێنراو بەسەر ئێراندا بەردەوامبێت".

ویلایەتەیەکگرتوەکانی ئەمریکا لەچوارچێوەی ستراتیژیی "ئەوپەڕی فشار" بۆسەر ئێران، هەمیشە هەوڵیداوە هاوپەیمانە نێودەوڵەتییەکانی وەک کۆریای باشورو ژاپۆن ڕابکێشێتە ناو هاوپەیمانییە دەریاییەکان لەکەنداوو گەروی هورمز، کۆریای باشور کە پەیوەندییەکی سەربازیی‌و وئابوریی توندی لەگەڵ ئەمریکا هەیە، لەنێوان پاراستنی هاوپەیمانییەکەی لەگەڵ واشنتۆن‌و پاراستنی بەرژەوەندییەکانی لەگەڵ تاراندا توشی دڵەڕاوکێ بوە.

گەروی هورمز یەکێکە لەگرنگترین ڕێڕەوە ئاوییەکانی جیهان کە نزیکەی 20٪ بۆ 30٪ی نەوتی جیهانی پێدا تێدەپەڕێت‌و ئێران خۆی بەپارێزەری سەرەکی ئەم گەروە دەزانێت‌و هەر جۆرە بونێکی سەربازیی هێزە بیانییەکانیش، بەتایبەتی ئەوانەی لەژێر چەتری ئەمریکادان، وەک هەڕەشەیەکی ڕاستەوخۆ بۆ سەر ئاسایشی نەتەوەیی خۆی دەبینێت.

پەیوەندییەکانی ئەم دوو وڵاتە لەساڵانی ڕابردودا چەندین تەنگژەی توندی بەخۆیەوە بینیوە، لەوانە، پارە بلۆککراوەکان، بۆ ماوەی چەندین ساڵ نزیکەی حه‌وت ملیار دۆلاری پارەی نەوتی ئێران لەبانکەکانی کۆریای باشور بەهۆی سزاکانی ئەمریکاوە بلۆککرابوو، ئەمەش تێرانی زۆر توڕە کردبوو (هەرچەندە دواتر لەڕێگەی ڕێککەوتنێکەوە چارەسەرکرا)، هه‌روه‌ها دەستبەسەرداگرتنی کەشتییەکان، لەساڵی 2021دا، سوپای پاسدارانی ئێران کەشتییەکی نەوتهەڵگری کۆریای باشوری لەکەنداو دەستبەسەرکرد کە زۆرێک وەک وەڵامێکی تاران بۆ بلۆککردنی پارەکانی لەسیئۆل لێکیاندایەوە.

ئەمجارە ئێران زمانێکی زۆر توندتر بەکاردەهێنێت، بەکارهێنانی دەستەواژەی "تێوەگلانی ڕاستەوخۆ لەجەنگ" پەیامێکی ڕونە بۆ سیئۆل کە تاران چیتر بەتەنها بە"دەستبەسەرداگرتنی کەشتی" وەڵامناداتەوە، بەڵکو ئەگەری هەیە هێزەکانی کۆریای باشور وەک ئامانجێکی سەربازیی شەرعی ببینێت ئەگەر بێنە ناو هاوکێشە ئەمنییەکانی گەروی هورمزەوە.

ئێران دەیەوێت بەم هۆشدارییە، کۆریای باشور ناچاربکات کە لەنێوان "دڵنیاکردنەوەی واشنتۆن"و "پاراستنی ئاسایشی کەشتیگەل‌و بەرژەوەندییەکانی لەناوچەکەدا"، دوەمیان هەڵبژێرێت، چونکە تاران باشدەزانێت کۆریای باشور وەک وڵاتێکی پیشەسازیی، بەبێ نەوت‌و ئاسایشی کەشتیوانی لەڕۆژهەڵاتی ناوەڕاست، توشی قەیرانی گەورە دەبێت.