شارپرێس:
لەسەروبەندی هەڵبژاردنی پەرلەمانی عێراقدا، جموجۆڵی چاوەڕواننەکراو لەلایەن هێزە سەربازییەکانی ئەمریکاوە بەڕێوەدەچێت؛ چاودێرانیش ڕایده‌گه‌یه‌نن، جموجۆڵەکان دەتوانن بەجددی ئاڵنگاری هاوکێشە سیاسی‌و ئەمنییەکانی ناوچەکە بکەن.
بەگوێرەی سەرچاوە عێراقییەکان، هێزە ئەمریکییەکان کە لەبەغدا جێگیرکراون، لەناکاوو بەبێئەوەی هیچ ڕونکردنەوەیەکی فەرمی پێشکەشبکەن، گرێبەستی بەکرێدانی نیشتنەوەی فریاگوزارییان لەیەکێک لەبارەگاکانیان هەڵوەشاندوەتەوە، له‌م نێوه‌نده‌دا گرێبەستەکانی دابینکردنی بەرهەمە نەوتییەکانی بنکەی ئاسمانی عەین ئەسەدی له‌پارێزگاى ئه‌نباریش هەڵوەشاندوه‌ته‌وه.
محەمەد دلێمى ئەندامی هاوپەیمانی یەکگرتوی ئەنبار، بەئاماژەدان بەم گۆڕانکاریانە، هۆشداریدەدات لەوەی کە ئەم ڕێوشوێنانە پێشەکییەکە بۆ گواستنەوەی تەواوەتی هێزەکانی ئەمریکا بۆ هەرێمی کوردستان.
ئاشکراشیکردوه، پڕۆژە نوێیەکەی واشنتۆن بریتییە لەگواستنەوەی هێزەکانى بۆ هەرێمی کوردستان‌و گەڕاندنەوەی بنکە سەربازییەکان بۆ حکومەتی ناوەندیی لەبەغدا.
ئەم گۆڕانکارییە ستراتیژییە لەکاتێکدایە کە بەشێک لەچاودێران بەپەیوەندیی بەپێشهاتەکانی ئەمدواییە سەبارەت بەچالاکییەکانی پارتی کرێکارانی کوردستان (پەکەکە)و فشارەکانی حکومەتی تورکیا دەزانن.
باس له‌وه‌شده‌كه‌ن، چەکداماڵینی پەکەکە بیانویەکی بەحکومەتی ئەنكەرە داوە تا لەچوارچێوەی بەرەنگاربونەوەی تیرۆردا نفوزی خۆی لەهەرێمی کوردستان‌و ڕۆژئاوای کوردستان زیادبکات؛ شتێک کە ڕەنگە گرژییە ناوچەییەکان زیاتربکات.
بەلەبەرچاوگرتنی کاتی ئەوکارانە، بەشێک لەشرۆڤەکاران وەک بەشێک لەدیزاینێکی ئاڵۆز بۆ کاریگەریکردن لەسەر ژینگەی سیاسی‌و ئەمنی عێراق لەسەروبەندی هەڵبژاردنەکاندا دەبینن، تائێستاش هیچ کاردانەوەیەکی فەرمی لەلایەن حکومەتی ناوەندی عێراق‌و هەرێمی کوردستانەوە بڵاونەکراوەتەوە.
شه‌پۆل مامه‌ش
