شارپرێس:
بەشێک لەئەندامانی ئەنجومەنی کارگێڕیی دەستەی سەربەخۆی مافی مرۆڤ ڕاگه‌یه‌نراوه‌كه‌ى شه‌وى ڕابردوى ده‌سته‌كه‌یان ڕه‌تده‌كه‌نه‌وه، ڕاشیده‌گه‌یه‌نن، "ناوەڕۆکەکەی ڕەتدەکەینەوەو بەهەڵوێستێکی سیاسیی دیزاینکراوی دەزانین"، ده‌شڵێن:"سەرباری ئەوەی گفتۆگۆی زۆرکرا بۆ دواخستنی بڵاوکردنەوەی بەیاننامەکە تا ڕۆژی یەکشەممە کە دەوامی فەرمییە، بەڵام دیارە بڕیاری پێشوەختە بوە".
شەوی ڕابردوو ڕاگەیەندراوێک بەناوی دەستەی سەربەخۆی مافی مرۆڤ بڵاوکرایەوە لەسەر ڕوداوەکانی لالەزارو کەیسی ئارام قادرو جه‌ختكرایه‌وه له‌لایه‌ن ده‌زگاى ئاسایشه‌وه ڕێگرییان لێكراوه له‌سه‌ردانى گیراوانى لاله‌زارو كه‌یسى ئارام قادره‌وه.
بەشێک لەئەندامانی ئەنجومەنی کارگێڕیی دەستەی سەربەخۆی مافی مرۆڤیش ئه‌مڕۆ شه‌ممه ڕاگه‌یه‌نراوێكیان بڵاوكردوه‌ته‌وه‌و ده‌ڵێن، "هەرچەندە ئێمە وەک بەشێک لەئەندامانی ئەنجومەنی کارگێڕیی دەستە، ناوەڕۆکەکەی ڕەتدەکەینەوەو بەهەڵوێستێکی سیاسیی دیزاینکراوی دەزانین، چەندینجاری دیكه‌ش سەرنج‌و تێبنیمان هەبوە لەسەر ئەوجۆرە هەڵوێست‌و پەیامانەی دەستە؛ کە نە ئاگامان لێی بوەو نە پرسیشمان پێکراوە، بەڵام لەپێناو پاراستنی ناوی دەستەکەمان هیچ هەڵوێستمان نەنواندوەو هەموو جارێک داوای چارەسەرمان کردوە".
له‌و ڕوه‌شه‌وه سەبارەت بەڕاگەیەندراوه‌كه‌ى شه‌وى ڕابردوى ده‌سته‌كه، بەشێک لەئەندامانی ئەنجومەنی کارگێڕیی ئه‌و دەستەیه ده‌ڵێن:
1ـ سەبارەت بەسەردانکردنی ئارام قادر لەهەفتەی ڕابردوو، دوای ئەوەی کەسوکاری ناوبراو سەردانی دەستەیان کرد، داوایانکرد دەستە بەدواداچون بکات، ئێمە پەیوەندیمان بەلایەنی پەیوەندیدارەوە کردو بەسوپاسەوە وەڵامیانداینەوە کە لەم هەفتەیەی بێتەوە ئەو دەرفەتەمان بۆ ڕێکدەخەن‌و بڕیارە ڕۆژی یەکشەممە بۆ کاتەکەی وەڵاممان بدەنەوە، بەڵام نازانین پەلەی بڵاوکردنەوەی ئەو پەیامە بەو پشوەو ڕۆژی هەینییە مانای چی بوو؟.
2ـ سەبارەت بەدەستگیرکراوانی شەڕەکەی لالەزار هەمولایەک ئاگادارن، ئێمە یەکەم تیم بوین وەک دەستە سەردانی لاهور شێخ جه‌نگی‌و دەستگیرکراوەکانمان کردو هەر لەڕێگەی ئێمەشەوە، ئاسایشی گشتیی سلێمانی ئاسانکاریی کرد بۆ سەردانکردنی کەسوکاری دەستگیرکراوەکان‌و بەردەوامیش لەسەر خەتبوین بۆ سۆراغکردن‌و کۆکردنەوەی زانیاریی لەسەر هەمویان، هیچ ڕێگریەک نەبوە بۆ کارەکانمان، بڕیاربوو ڕۆژی یەکشەممە هەموو ئاسانکارییەک بکرێت، بەڵام دیسان نەیانهێشت بگاتە یەکشەممە وەک ئەوەی پێیانوترابێت؛ دەبێت هەر ئەمشەو ئەو بەیاننامەیەی کە ئامادەکراوە دەبێت بڵاوبکرێتەوە، ئه‌مه‌ش سەرباری ئەوەی گفتۆگۆی زۆرکرا بۆ دواخستنی بڵاوکردنەوەی بەیاننامەکە تا ڕۆژی یەکشەممە کە دەوامی فەرمییە، بەڵام دیارە بڕیاری پێشوەختە بوە.
هه‌ر له‌و ڕاگه‌یه‌نراوه‌دا هاتوه، "دەمانەوێ ئەوە بۆ هەمولایەک ئاشکرابکەین؛ ئێمە وەک بەشێک لەئەنجومەنی کارگێڕی دەستە، ئەو پەیامەی بەناوی دەستەی مافی مرۆڤ بڵاوکراوەتەوە، ڕەتدەکەینەوەو دەڵێین، بەهیچ شێوەیەک گوزارشت لەڕای هەموو دەستە ناکات‌و تەنها ڕای لایەنێکی سیاسییە کە ناوی دەستە بۆ ئامانجی سیاسیی خۆیان بەکاردەهێنن‌و بەئاشکراش بەپەیامەکەی دەستەو ئەو پەلەپەلکردنەوە دیارە".
وه‌كو نوسیویانه، "ئێمە دەڵێین: لایەنە ئەمنییەکانی سلێمانی لەڕۆژی یەکەمی ڕوداوەکەی لالەزارو بابەتەکانی دیكه‌ش هاوکاربون‌و دەبوو دەستە ڕەچاوی ئەوەی بکردبایە ئەو کەیسە هێشتا لەژێر لێکۆڵینەوەیەو نابێت پەلەی تێدابکرێت".
له‌و ڕوه‌شه‌وه ده‌پرسن، "ئینجا پرسیاری جددی ئەوەیە: ئەی ئەو بەشەی ئەنجومەنی کارگێڕیی دەستە لەکوێ بون کاتێک لەشەڕەکەی خورشید هەرکی‌و هێزە ئەمنیەکان، دوو کەس لەهێزەکان شەهیدکران‌و کەسی داواکراویش لەمیوانخانە دانرابوو، بەڵام ئەو تیمەی ناو دەستە شتێکیان نەوت؟".
ئه‌وه‌ش ده‌ڵێن، "ئەی کە چەند ڕۆژێک بەر لەئێستا چەند کەسێک هەوڵی تیرۆرکردنی ڕۆژنامەنوس هێمن مامەندیانداو دواتر هەڵهاتن بۆ شاری هەولێرو ئاسایشی گشتیی سلێمانی پەیامی بڵاوکردەوە، بۆچی ئەرک پێسپێردراوانی ئەو لایەنە سیاسییەی ناو دەستە داوایان لەدەزگا ئەمنیەکانی هەولێر نەکرد ئەوکەسانە دەستگیربکەن‌و بیدەنە دادگا؟.
به‌رده‌وامده‌بن‌و ڕایده‌گه‌یه‌نن، "ئەی کاتێک سەرۆکی دەستە ئامادەی دادگاییکردنی شێروان شێروانی بوو، بەبەرچاوی بەڕێزیان دادگا بڕیارێکیدا بەسەر ناوبراوداو لەبەردەمی دادگاش چالاکوانان‌و ئەندامی پەرلەمان سوکایەتیان پێکرا، بۆچی دەستەی مافی مرۆڤ هیچ شتێکیان بڵاونەکردەوە؟ لەکاتێکدا نوێنەری یۆنامی نیگەرانی دەربڕیی، ئەی بۆ تائێستا تۆمەتبارانی کەیسی شوان سابر دەستگیرو ئاشکرانەکراون‌و هیچ پەلەپەلێکیش ناکرێت؟".
سه‌باره‌ت به‌ئه‌دهه‌م بارزانیش ده‌ڵێن، "ئەی کاتێک شێخ ئەدهەم بارزانی ڕێگەی پێنەدرا بەشداریی پرسەی دایکی بکات لەماڵ‌و زێدی خۆیی‌و دەستبەسەر ماڵ‌و موڵکیدا گیراو پاسەوان‌و شۆفێرەکەی دەستگیرکراو جارێکی دیكه‌ش بەمدوایە کۆمەڵێک پاسەوانی گیرا، بۆچی ئەو لایەنەی ناو دەستە شتێکی بۆ ڕای گشتیی نەوت‌و بڵاونەکردەوە؟.
سەبارەت بەکەیسی هونەری ڕەشید ئاغا-ش هاتوه، "تائێستاش دادگایی نەکراوەو کەس نازانێت قۆناغی لێکۆڵینەوەی بەکوێگەیشتوە، بۆ هیچ ناڵێن؟ خۆ هەموو ئەوانە لەپێش ڕوداوەکانی سلێمانی ڕویانداوە!، ئێمە نامانەوێ ئەو لاپەڕانە هەموو هەڵدەینەوە کە هەمویمان وەک بەڵگە لایەو قسەی لەسەرنەکراوە لەپێشێلکاریی زەق بەرامبەر مافی مرۆڤ لەسنوری هەولێرو دهۆک".
جه‌ختیشده‌كه‌نه‌وه، "باشدەزانین ئامانجی ئەو لایەنە سیاسیە چییە لەگەورەکردن‌و بڵاوکردنەوەی پەیامەکان لەسەر سنوری سلێمانی‌و دەزگا ئەمنیەکان لەڕێگەی دەستەکەمانەوە، جگە لەهەوڵدان بۆ ناشرینکردنی دەزگا فەرمیەکانی ئەو سنورە هیچ مانایەکی دیكه‌ى نییەو ئامانجەکەش دەستێکی ئاشکرای لایەنێکی سیاسییە کە دەیانەوێت ئەجێندای خۆیان فەرزبکەن‌و ئێمەش وەک بەشێک لەئەنجومەنی کارگێڕیی دەستە ئەوجۆرە هەڵسوکەوتانە ڕەتدەکەینەوەو بەهیچ شێوەیەکیش گوزارشت لەڕای گشتیی دەستە ناکات، ئەگەرنا هەمولایەک لەدەستە باشدەزانن، ئێمە ئەو بەشەین لەدەستەی مافی مرۆڤ زۆر پیشەیی‌و بەرپرسیارانە بەرامبەر بەمافەکانی مرۆڤ‌و بێگوێدانە لایەنی سیاسیی کارمانکردوە لەهەموو ڕوداوەکان".
ئه‌و بەشه‌ى كه وه‌ك ئەندامانی ئەنجومەنی کارگێڕی دەستەی سەربەخۆی مافی مرۆڤ خۆیان ناساندوه هۆشداریده‌ده‌ن‌و ده‌ڵێن، "بەردەوامی ئەوجۆرە هەڵوێستانە بۆ بەرژەوەندیی لایەنێکی سیاسیی، دەکەوێتەسەر ئەستۆی بەڕێز سەرۆکی دەستەکەو به‌گوێره‌ى یاسای دەستە بەرپرسە لەپاراستنی سیاسەتی دەستە وەک دەزگایەکی سەربەخۆو بێلایەن‌و ئاکامەکانیش هەرچی بێ لەزەرەری ناوبانگی دەستە دەبێت".
