شارپرێس:
عەلی نزار سەرۆکی ڕێکخراوی بەبازاڕکردنی نەوت (سۆمۆ) ڕۆژی شەممە ڕایگەیاند، دەستپێکردنەوەی هەناردەکردنی نەوتی کوردستان پەیوەستە بە کۆمپانیا بەرهەمهێنەرەکانەوە.
عەلی نزار بە ئاژانسی شەفەق نیوزی ڕاگەیاند، "لە ڕێککەوتنی وەزارەتی نەوتی فیدراڵی و سۆمۆ و وەزارەتی سامانە سروشتییەکان لە هەرێمی کوردستان میکانیزمی توند بۆ جێبەجێکردنی یاسای بودجە دانراوە".
ئاماژەی بەوەشکرد، گەشبینین بە ڕێککەوتنەکە و میکانیزمەکان و دەستپێکردنەوەی هەنارکردەکردنی نەوتی هەرێم لە ڕێگەی بۆری تورکیا-جەیهانەوە، چونکە ئەمە لە بەرژەوەندی عێراقدایە و داهاتەکانی بەرزدەکاتەوە.
جەختیشی کردەوە "کاتی دەستپێکردنەوەی هەناردەکردنی نەوت پەیوەستە بە کۆمپانیا بەرهەمهێنەرەکانی نەوت".
لای خۆیەوە فوئاد حسێن، وەزیری دەرەوەی عێراق ئەمڕۆ شەممە ئاشکرایکرد، "سەبارەت بە ڕێککەوتنی نێوان حکومەتی فیدراڵی و حکومەتی هەرێمی کوردستان، پێشکەوتنی بەرچاو لە پرسی داهاتە نانەوتییەکان هەیە" و پێشبینیش دەکات "لەماوەی چەند ڕۆژی داهاتوودا لێکتێگەیشتنێک بکرێت".