شارپرێس:
ئیلۆن ماسک، ملیاردێری ئەمریکی و دامەزرێنەری کۆمپانیای "ئێکس ئێی ئای"، پێشبینی دەکات کە ژیرێی دەستکرد (AI) داهاتووی مرۆڤایەتی دەگۆڕێت و کارکردن دەکاتە شتێکی "هەڵبژاردەیی" و نرخی پارە نامێنێت.

لە کۆڕبەندی وەبەرهێنانی ئەمریکی-سعودی لە واشنتۆن، ماسک ڕایگەیاند: کارکردن دەبێتە خوایشت و خۆبەخشانە، لە ماوەی دە بۆ بیست ساڵی داهاتوودا، کارکردن وەک وەرزشکردن یان یارییە ڤیدیۆییەکان دەبێت، تەنها ئەوانەی حەزیان لێیە دەیکەن.

 بێبەها بوونی پارە: ئەگەر گەشەسەندنی AI و ڕۆبۆتەکان بەردەوام بێت، ماسک پێشبینی دەکات کە پارە لە قۆناغێکدا گرنگییەکەی نامێنێت و وەکو دراو بێبایەخ دەبێت.

 قەڵاچۆکردنی هەژاری: بە بڕوای ماسک، تاکە ڕێگە بۆ بنەبڕکردنی هەژاری و دابینکردنی چاودێری پزیشکی باش بۆ هەمووان بریتییە لە ڕۆبۆتی زیرەکی "ئۆپتیموس". کە دەخرێنە بازاڕەوە بۆ کارکردن.

 داهاتی جیهانی: ئەو جەختی کردەوە کە لەم داهاتووەدا، پێویستە حکومەت داهاتێکی گشتگیری جیهانی (Universal Income) دابین بکات، چونکە AI و ڕۆبۆتەکان کار و پارە لەناودەبەن.

 لەم حاڵەتە گەشبینەدا، هەموو کەسێک دەتوانێت دەستی بە هەر کاڵا و خزمەتگوزارییەک بگات کە دەیەوێت، هەرچەندە شڵەژان و گۆڕانکاری زۆر ڕوودەدات.

ماسک جەختی لەوە کردەوە کە هێشتا کارێکی زۆر ماوە بکرێت تاوەکو کۆمەڵگا و تەکنەلۆژیا دەگەنە ئەم ئاستە.

ئاکۆ عەبدوڵڵا ئاڵی