شارپرێس:

 پاکستان یاداشتێکی لێکتێگەیشتنی واژۆکرد بۆ فرۆشتنی فڕۆکە جەنگییەکانی JF-17  هەنگاوێک کە سەرنجی شیکەرەوانی بەرگری و پسپۆڕانی فڕۆکەوانی و سەردانیکەرانی پێشانگای فڕۆکەوانی دوبەی 2025 ڕاکێشاوە.

بەگوێرەی میدیاکانی پاکستان، پاکستان لە میانی پێشانگای فڕۆکەوانی دوبەی گرێبەستێکی بۆ فرۆشتنی فڕۆکەی جەنگی JF-17 بە وڵاتێکی دۆست واژۆ کردووە، ئەمەش دوای ئەوەی ئازەربایجان وەجبەی کۆتایی ئەم مۆدێلەی وەرگرت. ئەم فڕۆکە جەنگییانە تەکنەلۆژیای پێشکەوتوو و توانای شەڕکردنی باشیان هەیە.

لە بەیاننامەیەکدا کە نوێنەرایەتی پاکستان لە دوبەی بڵاویکردووەتەوە، ناوی وڵاتی پەیوەندیدار و ژمارەی ئەو فڕۆکە جەنگیانەی ئاشکرا نەکردووە کە فرۆشراون، بەڵام ئاماژەی بەوە کردووە کە چەند وڵاتێکی دیکە ئارەزووی خۆیان بۆ بەدەستهێنانی فڕۆکەی جەنگی JF-17 دەربڕیوە، ئەمەش ئاماژەیە بۆ پەرەسەندنی متمانەی نێودەوڵەتی بە پیشەسازی فڕۆکەوانی پاکستان.
 ئ.ح