شارپرێس:
دوای ئەوەی ئەمڕۆ لەسلێمانی لەژێر دروشی )هەینی كوردان( خۆپیشاندانی ملیۆنی ئەنجامدرا، ئەنجومەنی سەرتاسەری خۆپیشاندانەكان لەبەیاننامەیەكی پێنج خاڵیدا داوا لەڕێکخراوی نەتەوە یەکگرتوەکان، یەکێتی ئەوروپاو ڕێکخراوەکانی مافی مرۆڤ و ناوەندەکانی بڕیار لەجیهان دەکەن، هەنگاو بەئاراستەی پاراستنی کورد بنێن.


ئەنجومەنی سەرتاسەری خۆپیشاندانەكان لەبەیاننامەیەكدا كە بەزمانی عەرەبی و ئینگلیزی ئاڕاستەی جیهان كراوە دەڵێت،" گەلی کورد، لە گەورەترین نەتەوە بێ دەوڵەتەکانی دنیایە، نەتەوەی ئێمە، مێژوویەکی دوورودرێژە خەبات بۆ ئازادی و مافە سیاسی و کولتورییەکانی دەکات، تێدەکۆشێت تا وەک باقی گەلانی تری جیهان بتوانێت لەنیشتمانی خۆیدا، بە ناسنامەی جیاوازی خۆی بژی و چوارچێوەیەکی سیاسی و یاسایی هەبێت".

جەختیش كراوەتەوە كە، لە ماوەی سەد ساڵی ڕابردودا، کورد لەتەواوی بەشەکانی کوردستان، بە دڕندانەترین شێوە کەوتوەتە بەردەم پەلاماری فاشیزمی نەتەوە باڵادەستەکانی ناوچەکەو لە سەرەتاییترین مافە سیاسی و کولتوری و مرۆییەکانی بێبەش کراوە.

لەبارەی ئەو دۆخەی لەڕۆژئاوا هاتۆتە پێشەوە، ئەنجومەنەكە ئاماژە بەوەدەدات، ئەوەی ئێستا لەڕۆژئاوای کوردستان ڕودەدات، پیلانگێڕییەکی نوێیە بۆ لەباربردنی هەر هەوڵدانێکی کورد بۆ گەیشتن بەمافە نەتەوەیی و مرۆییەکانی. پیلانگێڕی سەر ڕۆژئاوا، بە تەنها پیلانگێڕی نییە بۆ سەر ئەزمونی کوردانی بەشێکی دیاریکراوی کوردستان، بەڵکو پیلانگێڕییە بۆ سەر بونی سیاسی و کۆمەڵایەتی کورد لەتەواوی بەشەکانی کوردستان و هەوڵدانێکی فاشیانەیە بۆ هێشتنەوەی وەک مرۆڤی مافخوراو و بندەست.

جەختیش دەكەنەوە، كە بەرخودان و خۆڕاگری کورد لەبەرانبەر پیلان و هاوپەیمانێتییە ژەهراوییەکان، وەک چۆن ل ڕابردوو هێزی بەتاڵکردنەوەی خەونی دوژمنانی پیشانی هەموو جیهاندا، لەدۆخی بەرخودان و خۆڕاگری ڕۆژئاواشدا کوردان بە گوتاری یەکێتی و یەکگرتوویی، بە کۆبوونەوەی هەمووان لەسەر سفرەی کوردبوون، دەتوانن دوژمنان و نەیارانی کورد و ئەزمونەکەی بهێننە سەرچۆک.

لەكۆتایی بەیاننامەیەكەشدا، بەناوی سەرجەم خۆپیشاندەران و پشتیوانانی ڕۆژئاوا، داوا لە ڕێکخراوی نەتەوە یەکگرتوەکان، یەکێتی ئەوروپا و ڕێکخراوەکانی مافی مرۆڤ و ناوەندەکانی بڕیار لەجیهان دەکەین هەنگاو بە ئاراستەی کارکردن بۆ ئەم 5 خاڵە بنێن:


١.هەوڵدان بۆ دەرکردنی بڕیارێک لەلایەن ئەنجومەنی ئاسایشی نەتەوە یەکگرتووەکان، بۆ دابینکردنی ناوچەیەکی ئارام و دژەفڕین بۆ ڕۆژئاوای کوردستان.
٢.هەڵگرتن و کۆتاییهێنان بە گەمارۆی دەوڵەتی ناوەندی لەسەر ناوچەکانی ڕۆژئاوای کوردستان.


٣.کێشە سیاسییەکان لەسوریای نوێدا، بە ڕێگەی ئاشتیانە، بە لەبەرچاوگرتن و سەلماندنی مافە سیاسی و کولتورییەکانی تەواوی پێکهاتە جیاوازەکانی ئەو وڵاتە چارەسەر بکرێن.

٤.کۆتایی بە دەستوەردانی دەوڵەتی تورکیا لە کاروباری سوریا بهێنرێ، چونکە تورکیا، جگە لەوەی هۆکارێکی سەرەکی تەواوی کێشەکان و جەنگ و خوێنە، هێزی سەرەکی لێدانیشە لە هەر هیوا و ئامانجێکی سیاسی کورد. هەر وەک چۆن ئەم ئامادەییە سیاسی و سەربازی و هەواڵگرییەی تورکیا لە نێو ڕووداوەکانی سوریادا، ڕێگەخۆشکەر دەبێت بۆ سەرلەنوێ بەهێزبوونەوەی داعش و ناسەقامگیری لە ناوچەکە و بەیەکدادانی نێوان پێکهاتەکان.


٥.داوا له‌ ڕێکخراوەکانی مافی مرۆڤ ده‌كه‌ین، لێكۆڵینه‌وه‌ له‌و راپۆرتانه‌ بكه‌ن، كه‌ باس له‌ ئه‌نجامدانی‌ پێشیلكاری یاسا نێودەوڵەتییەکان لە کاتی هێرشی دیمەشق بۆ سەر هێزەکانی هەسەدە دەکەن، وەک، کوشتنی هاوڵاتیان و دەستدرێژیکردنە سەر خەڵکی مەدەنی، ئەشکەنجەدان و بێ ڕێزیکردن بە تەرم و گۆڕستانەکان.