شارپرێس:

تۆم باراک, نێردەی تایبەتی ئەمریکا بۆ سوریا ڕایگەیاند، ڕێککەوتنی کۆتایی و گشتگیری ئاگربەست لەنێوان دمشق و هێزەکانی سوریای دیموکرات وەرچەرخانێکی مێژووییە بەرەو سەقامگیری و یەکڕیزی نیشتمانی لەسوریا.

باراک ئاماژەی بەوە کرد کە ئەم هەنگاوە ئەنجامی دانوستانێکی وردە و پابەندی هەردوولا بە حوکمڕانییەکی گشتگیر و ڕێزگرتنی دوولایەنە نیشان دەدات.

دەشڵێت: حکومەتی سووریا لە ڕێگەی تێکەڵکردنی پێکهاتە سەربازیی و کارگێڕییەکان لەناو دامەزراوە دەوڵەتییەکاندا، خواستی خۆی بۆ هاوبەشی ڕاستەقینە دەربڕیوە، هەروەها جەختی لە گرنگی ئەم ساتەوەختە بۆ گەلی کورد کردەوە و وەک دەستپێکێکی نوێ بۆ چاککردنی ستەمە مێژوییەکان و بەهێزکردنی پێگەی کورد لە ناوچەکەدا وەسفی کرد.

دەشڵێت: جێبەجێکردنی مەرسومی سەرۆکایەتی ژمارە 13 وەک هەنگاوێکی گرنگ بەرەو یەکسانی و گەرەنتی بەشداری کورد لە ئاوەدانکردنەوەی داهاتوی سوریادا بینرا.

لەکۆتاییدا دەڵێت: ئەم گۆڕانکارییانە زەمینە خۆش دەکەن بۆ گەڕاندنەوەی متمانە و ڕاکێشانی وەبەرهێنان، تا سوریا دووبارە ببێتەوە بە ناوەندی ئارامی لە ناوچەکەدا.

ئاکۆ عەبدوڵڵا ئاڵی