شارپرێس:

ئاژانسی "بلۆمبێرگ" لەسەر زاری سەرچاوە ئاگادارەکان ئاشکرای کرد کە بۆ یەکەمجار لە دوای هەڵگیرسانی جەنگی ئەمریکا و ئیسرائیل دژی تاران، کۆبوونەوەیەکی ڕاستەوخۆ لە نێوان بەرپرسانی باڵای ئاسایشی نیشتمانیی ئیمارات و ئێران بەڕێوەچووە؛ ئەمەش وەک وەرچەرخانێکی گرنگ لە پێوەندییەکانیاندا دەبینرێت دوای چەندین مانگ لە گرژیی سەربازی.

بەپێی سەرچاوەکان، ئیمارات دەیەوێت پڕۆژە ئابوورییە زەبەلاحەکانی لە بوارەکانی نەوت و ژیریی دەستکرددا بپارێزێت، لە کاتێکدا ئێران ئیمارات بە هاوبەشێکی بازرگانیی گرنگ بۆ هەناردەکردنی نەوتەکەی دەزانێت.

ئەوەش هاتووە:  سەرەڕای ئەوەی ئیمارات لە کاتی جەنگدا ڕووبەڕووی زۆرترین هێرشی ئێرانی بووەوە، بەڵام ئێستا گەیشتۆتە ئەو بڕوایەی کە ڕووخاندنی ڕژێمی ئێران بژاردەیەکی واقیعی نییە و پێویستە ڕێگەی دیپلۆماسیی بگرێتەبەر، هاوشێوەی سعوودیە و قەتەر کە ئەوانیش پێشتر هێرشیان کرابووە سەر و ئێستا بەرەو هێورکردنەوەی دۆخەکە هەنگاو دەنێن.

 وڵاتانی کەنداو پێیان وایە بەهۆی پێگەی جوگرافی و سەربازیی ئێرانەوە، پێکەوەژیان بووەتە پێویستییەکی ستراتیژی.

بەرپرسێکی ئیماراتی ڕایگەیاندووە کە سیاسەتیان لەسەر بنەمای هێورکردنەوە و سەقامگیرییە، ئەمەش هاوکاتە لەگەڵ داواکاریی سەرۆکی ئیمارات و سەرکردەکانی سعوودیە و قەتەر لە دۆناڵد ترەمپ لە کۆتایی مانگی ئایاردا، بۆ ئەوەی دەرفەت بدرێتە دانوستان و نەگەڕێنەوە بۆ جەنگێکی گشتگیر.


ئاکۆ عەبدوڵڵا ئاڵی