شارپرێس:

سبەی شەممە، 13ی حوزەیران پارێزگای هەڵەبجە دەبێتە سەکۆی بەڕێوەچونی بۆنەیەکی گەورەی جیهانیی و ناوی دەچێتە ڕیزی ئەو وڵاتانەی کە بۆنەکە دەکەنە دەرفەتی گەشەسەندن و بوژانەوە لەبوارە جیاوازەکاندا.

بڕیارە سبەینێ شەممە، بۆنەی تێدئێکسی جیهانیی بە ناوی تێدئێکس ئاشتی لە پارێزگای هەڵەبجە بەڕێوەبچێت و ڕێکخەرانی بۆنەکەش دەڵێن،" ئامانجمانە جارێکی تر ناوی هەڵەبجە بخەینەوە سەر نەخشەی وڵاتانی جیهان بۆ بەڕێوەچونی بۆنە جیهانییەکان و بە دونیا بڵێین گەنجانی هەڵەبجە خاوەنی داهێنان و چیرۆکەکانی سەرکەوتنن، کە تەواوی دونیا چاوی لەو جۆرە چیرۆکانەیە".

هاوکار عزەت، ئەندامی لیژنەی بەڕێوەبردن و وتەبێژی تێدئێکس ئاشتی بە شارپرێسی ڕاگەیاند، هەموو ئامادەکارییەکان کراون و بۆنەکە لە کاتی خۆیدا و سبەینێ شەممە لەهۆڵی ڕوانگەی پارێزگای هەڵەبجە بەڕێوەدەچێت، ژمارەیەک کۆمپانیای هەڵەبجە و کوردستانیش پشتیوانی بۆنەکە دەکەن.

وتەبێژی تێدئێکس ئاشتی لەبارەی چالاکیەکانی بۆنەکەوە وتی،" لە تێدئێکس ئاشتیدا 13 کەسی سەرکەوتوو لە بوارە جیاوازەکانی ئەکادیمی و ئابوری و داهێنان و زانستی و وەرزشی و ئیداریدا چیرۆکەکانیان دەگێرنەوە کە هەمویان چیرۆکانێکن پێویستە هەموو گەنجێک بیانبینێت و چاویان لێ بکات بۆ ئەوەی بتوانێت ئیلهام لە چیرۆکەکانەوە وەربگرێت و بیکاتە سەرمەشق بۆ سەرکەوتن و داهێنان، هەروە وەک چۆن لە دروشمەکەمان وتومانە (داهاتوو دەنوسینەوە)".

هاوکار عزەت لەبارەی میوانەکانی بۆنەکەوە بەشارپرێسی وت “گەنجان و خوێندکارانی زانکۆ و پەیمانگاکان، کونسوڵخانە و نوێنەرایەتی وڵاتان و ڕێکخراوەکان و دامودەزگاکانی پارێزگای هەڵەبجە میوانی بۆنەکەن و هەموان پێکەوە بینەری چیرۆکە ئیلهام بەخشەکانی گەنجانی هەڵەبجە و کوردستان دەبن".

بە پێی ئەو ئامادەکاریانەی کە بۆ بۆنەکە کراون، تێدئێکس ئاشتی بە پێی هەموو ستانداردە جیهانییەکان دەبێتە گەورەترین بۆنەی گەشەپێدان و گەنجان و داهێنان لە هەرێمی کوردستان و پارێزگای هەڵەبجە و بڕیارە یەک ڕۆژ بخایەنێت.