شارپرێس:
 د. ئومێد عەلی ئەندامی پەرلەمانی کوردستان رایدەگەیەنێت، هەموو ئامێرێکی تەندروستی ساڵانە %20ی تواناکەی لەدەستدەدات و دەبێت ئامێرەکان بگۆڕدرێن، تەنانەت ئەگەر چاکیش بکرێتەوە سودێکی ئەوتۆی لێ نابینرێت، بۆیە باشتروایە بە ئامێری نوێ جێی بکرێتەوە.

 د. ئومێد عەلی، ئەندامی پەرلەمانی کوردستان و بەڕێوەبەری پێشوی نەخۆشخانەی شار لەسلێمانی لەکۆنگرەیەکی رۆژنامەوانیدا کە پەیامنێری شارپرێس ئامادەی بوو، ئاماژەی بەوەکرد،" ئەو ئامێرە تەندروستییانەی دەیکڕین زۆربەی لەکۆمەڵێک بازرگان و قاچاخچی دەکڕدرێن، ئەوەش کێشەیەکی گەورەمان بۆ دروستدەکات لە داهاتودا، هەم لە چاککردن و هەمیش لەڕوی قۆرەخکردنی لەڕوی نرخ و کوالێتی ئامێرەکە ".

وتیشی،" ئەمەش یەکێکە لە گرفتە گەورەکانی کەرتی تەندروستی لەهەرێمی کوردستان و عێراق، چونکە ئێمە دەزگایەکی نیشتیمانیمان نییە بۆ کڕینی ئامێر و دەرمانی پزیشکی ".

 ئومێد عەلی باسی لەوەشکرد،" کاتێک دەڵێین ئەو ئامێرانە لە قاچاخچی کڕدراون، واتە ئامێرەکە لەکۆمپانیای ئۆرجیناڵ ئامێرەکە نەکڕدراوە، بەڵکو لە دەسی دوو و سێ کڕدراون، بەوەش زەمان و کوالێتی ئامێرەکە خراپ دەبێت و یەدەگەکانی دەست ناکەوێت کە لەکاردەکەوێت و نرخەکەشی گرانترە ".