شارپرێس:
لەپێشهاتێکی گرنگدا کە کاریگەریی ڕاستەوخۆی لەسەر ژیانی ڕۆژانەی هاوڵاتیان دەبێت، وەزارەتی سامانە سروشتییەکانی حکومەتی هەرێم پلانێکی فرە ڕەهەندی بۆ چارەسەرکردنی قەیرانی سوتەمەنیو دابەزاندنی نرخی بەنزین ڕاگەیاند.
کەمال محەممەد ساڵح وەزیری سامانە سروشتییەکان بەوەکالەت، لەلێدوانێکی ڕۆژنامەوانیدا مژدەی بەشۆفێراندا کە لەم هەفتەیەوە ڕێگە بەهاوردەکردنی بڕێکی زۆر لەبەنزینی بازرگانی (موحەسەنو سوپەر) دەدرێت، ئەم هەنگاوەش دەبێتە هۆی دروستبونی کێبڕکێ لەبازاڕداو بەشێوەیەکی بەرچاو نرخی ئەو دوو جۆرە بەنزینە هەرزان دەکات.
وەزیر ئاشکرایکرد، بهگوێرهى ڕێککەوتنێکی نوێ لەگەڵ وەزارەتی نەوتی عێراق، ڕۆژانە 50 هەزار بەرمیل نەوت بۆ پێداویستی ناوخۆ دابیندەکرێت، هاوکات حکومەتی هەرێمیش 50 هەزار بەرمیلی دیکە بەنرخی پاڵپشتیکراو دەخاتەسەر هێڵی بەرهەمهێنان، بەمەش کۆی گشتیی دابەشکردنی بەنزینی نۆرماڵ لەشارەکانی هەرێم دەگاتە سێ ملیۆنو 500 ههزار بۆ چوار ملیۆن لیتر لەڕۆژێکدا کە لەدوێنێ شەممەوە بڕیارەکە چوەتە بواری جێبەجێکردنەوەو کاریگەری ئەرێنی خێرای دروستکردوە.
بۆ ڕێگریکردن لەهەر جۆرە قۆرخکارییو بەفیڕۆدانێک، وەزارەتی سامانە سروشتییەکان بەهاوکاری ههشت پاڵاوگەو کۆمپانیاکانی گواستنەوە، سیستەمێکی چاودێری توندی خستوەتە گەڕ، وهزیرى سامانه سروشتیهكان وتى، "تەواوی ئەو تانکەرانەی بەنزینەکە دەگوازنەوە، بەسیستەمی جی پی ئێس (GPS) و کامێرای چاودێری بەستراونەتەوەو لەساتەوەختی دەرچونیان لەپاڵاوگەوە تا دەگەنە بەنزینخانەکان، لەژێر چاودێری ورددا دەبن".
سەبارەت بەڕیشەی کێشەکە، کەمال محەممەد ئاماژەی بەبۆشاییەکی گەورەی داتایی کرد؛ لەکاتێکدا پشکی ئێستای بەغدا تەنها بەشی ملیۆنێكو 750 ههزار ئۆتۆمبێل دەکات، بەڵام لەواقیعدا زیاتر لهدوو ملیۆنو 800 ههزار ئۆتۆمبێل لەهەرێمی کوردستاندا ههیه.
وەزیری سامانە سروشتییەکان هیوای خواست لەداهاتوداو لەڕێگەی داتاکانی سەرژمێری نوێوە، پشکی هەرێم بهگوێرهى قەبارەی ڕاستەقینەی پارێزگاکان زیادبکرێت، تائەوکاتەش، حکومەتی هەرێم بەردەوامدەبێت لەپاڵپشتیکردنی دارایی بەنزینی جۆری نۆرماڵ بۆ سوكکردنی باری دارایی هاوڵاتیان.
