شارپرێس:
وەزارەتی دارایی و ئابوری رایگەیاند، لیستی موچەی مانگی تشرینی یەکەم و ڕاپۆرتی تەرازوی پێداچونەوەی مانگی ئەیلول ڕەوانەی بەغداد کرا، دەشڵێت، لیستەکە بە واژۆی ئاوات شێخ جەنابەوە نێردراوە.

وەزارەتی دارایی و ئابوری هەرێم لەڕاگەیەنراوێکدا ئاماژەی بەوەکرد،" ئێوارەی ئەمڕۆ چوارشەممە ڕێکەوتی ( 21 ی تشرینی یەکەمی 2026) بە واژۆی ئاوات شێخ جەناب لیستی موچەی مانگی تشرینی یەکەمی فەرمانبەران و موچەخۆرانی هەرێمی کوردستان و ڕاپۆرتی تەرازوی پێداچونەوەی مانگی ئەیلول لەلایەن تیمی تەکنیکی وەزارەتی دارایی و ئابوری هەرێمی کوردستانەوە ڕەوانەی شاری بەغداد کرا و سبەی پێنجشەممە بەفەرمی ڕادەستی فەرمانگەی ژمێریاری لە وەزارەتی دارایی فیدراڵ دەکرێت ".

ئەوەشیخستەڕوو، لە ڕوانگەی ئەوەی پرسی موچە بابەتێکی نیشتیمانییەو بەمەبەستی دروست نەبونی هیچ کێشەیەک بۆ موچەی فەرمانبەران و خانەنشینان و چین و توێژە جیاوازەکان، ئاوات شێخ جەناب واژۆی لەسەر لیستی موچە کردوە ، ئەوەش لە کاتێکدایە لە 29 ی ئەیلولەوە بەڕێزیان واژۆی لەسەر هیچ نوسراوێک نەکردوە و سورە لەسەر هەڵوێستەکانی کە لەسەرەتای ئەم مانگەوە ڕایگەیاندوە ".