شارپرێس:

دوای قسەکانی بافڵ لەبارەی دەوڵەمەندی قەزای چەمچەماڵ بە سامانی سروشتی و کەمی خزمەتگوزاری لەشارەکە، عەبدوڵای کوێخا موبارەک وەڵامی سەرۆکی یەکێتی دەداتەوەو دەڵێت،" بەخوای گەورە نە تۆ و نە کاک مەسرور بارزانی، نە پارتی و نە یەکێتی، ڕاستگۆ نین لەگەڵ خەڵکی چەمچەماڵ و دڵتان بۆ ئەو شارە ناسوتێ ".

عەبدوڵا کوێخا موبارەک لە پەیامێکدا بۆ بافڵ تاڵەبانی کە لەهەژماری فەرمی خۆی لە فەیسبوک بڵاویکردوەتەوە، ئاماژەی بەوەکردوە،" برا خۆ بە قسە و بڕیار و نوسراوی سەر کاغەز نابێت، فەرمون تۆزێ بە کردار خزمەتی خەڵکی بەش مەینەت و قوربانیدەری چەمچەماڵ بکەن ".

وتیشی،" ناڵێین لە شار و ناوچەکانی تر زیاتری بۆ بکەن، بەڵکو وەکو شارەکانی تر پرۆژەی ئاوەکەی تەواو بکەن و نیوەی شوێنەکانی تر گەنجەکانی دابمەزرێنن ".

عەبدوڵا کوێخا موبارەک لەپەیامەکەیدا دەشڵێت،" بەڵێن بێت ئەگەر جەنابت بە هەر شێوە و ڕێگایەک توانیت بودجەی تەواو بۆ پرۆژەی ئاوی گۆپتەپە-چەمچەماڵ دابین بکەیت و تا هاوینی داهاتوو پرۆژەکە تەواو بکەن من دێمە خزمەتت دەستەکانت ماچ دەکەم ".

ئەوەشیخستەڕوو،" تکایە ئیتر قسەی زلی بێ کردار و فریودەر واز لێبهێنن و تۆزێ جددی و ڕاستگۆ بن لەگەڵ خەڵکی خۆتان و پارێزەری ئەو قەوارە و حکومڕانیە خۆماڵیە بن کە بە تڕە کەڵەکێ ماومانە ".

باسی لەوەشکرد،" وەڵا خەریکە هەموو شت لە دەست بدەین بە هۆی پەیوەست نەبوونی ئێوە بە هیچ پێوەر و یاسا و دەستور و ماف و ئازادیەکی مرۆڤەوە لە کاتی قۆڵ بادان و ململانێی یەکتردا ".