شارپرێس:
هۆشیار سیوەیلی بەرپرسی مەكتەبی پەیوەندییەكانی دەرەوەی پارتی دیموكراتی كوردستان رایگەیاند تا ئێستا ھیچ وڵاتێك دژایەتی پرۆسەی ریفراندۆمی ھەرێمی كوردستانی نەكردووە، بەتایبەت ئەو پێنج وڵاتەی، كە ئەندامی ھەمیشەیین لەئەنجوومەنی ئاسایش.
ھۆشیار سیوەیلی بۆ پێگەی فەرمی حیزبەكەی راشیگەیاند "رای كۆمەڵگای نێودەوڵەتی بەشێوەیەكی گشتی لەبارەی پرۆسەی ریفراندۆم ئیجابییەو ھیچ وڵاتێك بەشێوەیەكی فەرمی دژایەی ڕاپرسییەكەی ھەرێمی كوردستانی نەكردووەو ھەڵوێستی توركیایش بەنەرێنی نابینین".
ئەو بەرپرسی پارتی ئەوەشی راگەیاند، "وڵاتانی دیكەش ئەوانەی بەفەرمی رای خۆیان نیشان داوە دژ نەبوون، بۆیە ئێمە لەگەڵ ئەنجامدانی ریفراندۆمداینو پێمان وایە ئەگەر ریفراندۆم ئەنجام بدرێت، ئەوكات ھەڵوێستی رای كۆمەڵگای نێودەوڵەتی پۆزەتیفتر دەبێت".
ئەو قسانە لەكاتێكدایە، كە ئێران بەفەرمی دژایەتی خۆی بۆ ئەنجامدانی ریفراندۆم دەربڕیوە، ئەمە سەرەڕای ئەوەی توركیا ئەمڕۆ چوار شەممە فەرەمی راگەیاند لەگەڵ یەكپارچەیی خاكی عێراقنو دژی هەر هەوڵێك بۆ جیابوونەوە لەو وڵاتە بدرێت.
سوەیلی هەروەها رایگەیاند "ھەركاتێك ئێمە سەربەخۆییمان راگەیاند، ئەوكات پێویستمان بەوە دەبێت كۆمەڵگای نێودەوڵەتی پشتگیری لەئێمە بكات، بەتایبەت وڵاتانی ئەندامی ھەمیشەیی ئەنجوومەنی ئاسایشو بەلایەنی كەمەوە ڤیتۆ بەكارنەھێنن، بۆیە لەئێستادا ھەڵوێستی ھەر پێنج وڵاتە زلهێزەكە پۆزەتیفە."
دەربارەی ئەوەیش، كە ئەمەریكا چ هەڵوێستێكی هەیە، رایگەیاند، "ئەمەریكا ھیچ گوشارێكی لەسەر ھەرێمی كوردستان نەكردووەو تەنیا لەسەر كاتەكەی رای جیاوازیان ھەیە، لەوەی ریفراندۆم ببێتە ھۆی لاوازیی بەرەی دژەتیرۆرو (بارزانی)ـیش ئەوەی بۆ ئەمەریكا ڕوونكردووەتەوە، بۆیە بەشێوەیەكی گشتی ھیچ وڵاتێك دژی پرۆسەی ریفراندۆمی باشووری كوردستان نییە."
بەرپرسی مەكتەبی پەیوەندییەكانی دەرەوەی پارتی جەخت دەكاتەوە لەوەی، لەناوخۆی ھەرێمی كوردستان ھەموو لایەنەكان یەكھەڵوێست بنو پێكەوە كار بۆ ئەو پرۆسەیە بكەن، ھەنگاوێكی زۆر گرینگ دەبێت.
ئەمە لەكاتێكدایە لایەنە سیاسییەكانی هەرێم بڕیاریانداوە رۆژی 25/9/2017 ریفراندۆم ئەنجامبدەن، كە ئەمە كاردانەوەی ناوخۆییو نێودەوڵەتی بەدواوە هاتووەو كاردانەوەكانیش بەردەوامی هەیە.
هـ ـ ح