شارپرێس:

 كۆنگرەی 23هـەمینی نائاسایی كۆنگرەی نەتەوەیی كوردستان كەنەكە لە هۆڵەندا بە بەشداری 300 ئەندام لە چوار پارچەی كوردستان و ئەمریكا و ئەوروپا و ئاسیا و ئوسترالیاوە دەستی پێكرد كە ماوەی دوو ڕۆژ دەخایەنێت.

سەرەتای كۆنگرە بە وەستان بۆ گیانی شەهیدان و سروودی نەتەوەیی “ئەی ڕەقیب” دەستی پێكرد و هەریەك لە ڕەفیق غەفوور و دڵشا عوسمان وتاری كردنەوەی كۆنگرەیان خوێندەوە.

 دڵشا عوسمان وتی، لە نێوان دامەزراوەكانی كوردان كار لە بوارەكانی ژن، گەنج، دیپلۆماسی و سیاسی دەكرێت و ئەمڕۆ وەك گەل بە قۆناغێكی هەستیاردا تێدەپەڕین، دەبێت ئەم قۆناغە ڕاست بەڕێوەببرێت، دەبێت گەلی كورد لە هەر چوار بەشی كوردستان خاوەن هەڵوێست بن.

زەینەب موراد هاوسەرۆكی كەنەكە رایگەیاند، ئێمە لە قۆناغێكی نوێداین، لە ٢٧ـی شووباتدا بە بانگەوازی ئاشتی و كۆمەڵگەی دیموكراتیكی عەبدوڵا ئۆجاڵان ئەم قۆناغە دەستی پێكرد، دەبێت گەلی كورد خاوەندارێتی لەم قۆناغە بكات، چونكە ئەمە كاتێكی زۆر گرنگە، دەبێت ئێمە دەستكەوتەكانی باشوور و ڕۆژئاوا بپارێزین، وەك گەلی كورد دەبێت بۆ ئەم قۆناغە نوێیە ئامادە بین، دەبێت هەموو پارت و هێزەكان ببنە یەك.

هاوكات ئەحمەد قەرەمووس هاوسەرۆكی كەنەكە رونیكردەوە، قۆناغەكە كە بە بانگەوازی بەڕێز عەبدوڵا ئۆجاڵان دەستی پێكرد، زۆر گرنگە، ئەم بانگە نەك تەنها بۆ كێشە ڕۆژانەییەكان، لە هەمان كاتدا هەوڵ بۆ چارەسەری داهاتووش دەدا، لەم قۆناغەدا هەموو پارت و بەشەكانی كوردستان ئەرك و بەرپرسیارێتییان دەكەوێتەسەر.

لای خۆیانەوە جەمیل بایك هاوسەرۆكی كۆنسەی بەڕێوەبەری كەجەكە و موراد قەرەیلان ئەندامی كۆمیتەی بەڕێوەبەری پەكەكە لەپەیامێكدا بۆ كۆنگرەكە دەڵێن، "دەمانویست ئێمەیش لە كۆنگرەی گشتیی كەنەكەدا ئامادەبین، بە ئەندامێتی ئەم دامەزراوە سەنگینە سەربڵندین. بەڵام لەبەر ئەو هۆكارانەی كە ئێوەیش دەیزانن، نەمانتوانی لەگەڵتاندا بین و بەشداربین. دەمانەوێت باوەڕ بەوەبكەن كە هەرچەندە دووریشبین و نەتوانین لە كۆنگرەكەدا بەشداربین ئەوا ئەركەكانمان بە گوێرەی ئامانجەكانی كەنەكە جێبەجێ دەكەین".

لەبەشێكی دیكەی پەیامەكەدا هاتووە "ڕۆژهەڵاتی ناوین پێی ناوەتە ناو سەردەمێكی نوێوە كە كوردستانیش دەگرێتەوە و پێشهاتی خێرا ڕوودەدەن. تابێت لە ڕۆژهەڵاتی ناوین هاوسەنگی هێز و پەیوەندی نوێ دێنەئاراوە، گەلی كوردیش هەوڵدەدات وەك كارەكتەرێكی چالاك بەشداری ئەم پرۆسەیە بێت. بۆئەمەش بێگومان شتی گرنگ و بنەڕەتی ئەوەیە كورد پەرە بە ستراتیژی هاوبەش بدات. ستراتیژی هاوبەش ئەو پێویستییە دەسەپێنێت كە پارت، ڕێكخستن، دامەزراوە و كەسانی كورد لە هەرچوارپارچەی وڵات و لە دەرەوەی وڵاتیشدا گفتوگۆی هاوبەش بكەن. لەم قۆناغەدا كەنەكە كارێكی گرنگ بە بێ كەموكوڕی پێكدەهێنێت و گەیشتووە بەو ئاستەی بتوانێت باشترین تێكۆشان بكات. بە تەواوی لەوباوەڕەداین كۆنگرەیش بۆ ئەم ئامانجە بڕیاری بەهێز بدات و پلانڕێژی كردبێت.

ئاشكراشیان كردووە "ڕێبەر عەبدوڵا ئۆجالان لە ئیمراڵی بەناوی تەڤگەرمانەوە لەگەڵ دەوڵەتی توركدا لە دیالۆگدایە. ئەم پرۆسەیە هێشتا درێژەی هەیە. ئامانجی ئێمەیش لەم پرۆسەیەدا بۆ ئەوەیە لە ڕێگەی دیالۆگەوە بۆ پرسی كورد ڕێگەی چارەسەری بدۆزینەوە. وەك تەڤگەر لەوباوەڕەداین لەم قۆناغەدا لە هەموو شتێك زیاتر بەرپرسیارێتی خۆمان بەجێ گەیاندووە. ئێستا كاتی لایەنەكەی دیكەیە. بەو هیوایەین لایەنی بەرانبەریش ئەركی خۆی جێبەجێ بكات و بگەین بە دەرنجامێك".

دەشڵێن "لە ماوەكانی داهاتوودا، وەك ئەندامی تەڤگەر و هاوكات وەك ئەندامی كەنەكە درێژە بە خەباتەكانمان دەدەین بۆ یەكێتی نەتەوەیی كوردان".

ئ.ه