شارپرێس:
سەرچاوەیەكی ئاگادار لە كۆنگرێسی ئەمەریكییەوە باسی لەوە كردووە، كە واشنتۆن كار لەسەر ئەوە دەكات لەڕێگای مانگە دەستكردەكانەوە خزمەتگوزاری ئینتەرنێتی خۆرایی بۆ خەڵكی ئێران دەستەبەر بكات .
ئەو سەرچاوەیە بە "ئاژانسی هەواڵی عەین"ی راگەیاندووە، ئەو هەنگاوە وەك پاڵپشتییەكی راستەوخۆیە بۆ شۆڕشی ئێرانییەكان دژ بە سیستەمی سەركوتكاری لەتاران .
بەقسەی ئەو سەرچاوەیە ئەو هەنگاوە دەرفەتی ئەوە بە جیهانی دەرەوە دەدات ئاگاداری ئەوەبن، كە لەناوخۆی ئێران چی دەگوزەرێت، بەتایبەت دەسەڵاتدارانی تاران بۆ دامركاندنەوەی خۆپیشاندانەكان خزمەتگوزاری ئینتەرنێتی بڕیوە .
سەرچاوە ئاگادارەكەی كۆنگرێس ئاماژەی بۆ ئەوەش كردووە، كە جیهانی دەرەوە مافی خۆیەتی بزانێت لەناو ئێران چی روودەدات تا هەنگاوی پێویست بۆ پشتیوانیكردنی گەلی ئێران بنێت.
هەر لەو چوارچێوەیەدا ، ڕێكخراوی موجاهیدینی خەڵق، كە مریەم رەجەوی رابەرایەتی دەكات لەبەیاننامەیەكدا داوای لەسكرتێری گشتی نەتەوە یەكگرتووەكان كردووە كۆبوونەوەیەكی بەپەلەی ئەنجوومەنی ئاسایش ڕێكبخات بۆ گفتوگۆكردن لەبارەی خۆپیشاندانەكانی ئێران و سەركوتكردنیان لەلایەن دەسەڵاتدارانی ئێرانەوە، كە بە قسەی ڕێكخراوەكە تائێستا زیاتر لە ٣ هەزار كەس بریندار بوون .
ماوەی دە رۆژ دەبێت خۆپیشاندان لەشارو شارۆچكەكانی ئێران دەستیپێكردووەو بەردەوامیشی هەیە، كە حكومەت وەك رێكارێك بۆ رێگری‌و تەشەنەی خۆپیشاندانەكان ئینتەرنێتی بڕیوە.
وەرگێڕان: ئاكۆ عەبدوڵڵا ئاڵی
