ململانێیەکان توندتر دەبنەوە
پارتی و پەکەکە لە ڕێککەوتنی سوریاوە بۆ شەڕی چەمانکێ

ڕاپۆرت

15/11/2020‌ 1329 جار خوێندراوه‌ته‌وه

شارپرێس:
هێشتا پارتی کرێکارانی کوردستان دەستی بە خەباتی چەکداریی نەکردبوو، لە کۆتایی حەفتاکان و سەرەتای هەشتاکانی سەدەی ڕابردودا، وەک پارتێکی سیاسی پەیوەندی لەگەڵ پارتی دیموکراتی کوردستان دروستکرد.

لە سەرەتای هەشتاکانی سەدەی ڕابردووەوە، پارتی و پەکەکە وەک دوو هێزی گەورەی گۆڕەپانی سیاسی لە باکور و باشوری کوردستان پەیوەندییەکانیان بەرزی و نزمی و بڕێک جار ڕێککەوتن و زۆر جاریش ئاڵۆزییان تێکەوت.

سەرەڕای جیاوازی فیکری و سیاسی، ئەم دوو هێزە بەردەوام ناکۆکی و ململانێکانیان خستوتە ئەستۆی یەکتری و هەر یەکەیان ئەوی دیکە بە هۆکاری خراپی پەیوەندییەکانیان تۆمەتبار دەکەن.

لە ماوەی ٣٥ ساڵی ڕابردوودا چەندین ڕوداو لە نێوان ئەم دوو هێزە کوردییەدا ڕویداوە و بەشێک لەو ڕوداوانە سەریان کێشاوە بۆ شەڕی چەکداریی ڕاستەوخۆ، ئەوەش بووتە هۆی کوژرانی سەدان کەس لە هەردوو لا، کە هەموو گەڕەکانی شەڕی نێوان ئەم دوو لایەنە بە قازانجی نەیاران و زیانی دۆزی کورد شکاوەتەوە.

هەرچەندە ساڵی ١٩٨٣ ڕێکەوتنێک لە نێوان پارتی و پەکەکە لە سوریا واژوکرا، بەڵام دوای دەستپێکردنی ئۆپەراسیۆنی سەربازی تورکیا لە دژی پەکەکە لە ساڵی ١٩٨٥، ئیدی پارتی کۆتایی بە ڕێککەتنەکەی نێوان خۆی پەکەکەی هێنا و لەوێوە ململانێیەکی درێژ خایەن سەری هەڵدا و زۆر جاریش ئەو ململانێیە شەری سەربازیی لێکەوتەوە.

لەو کاتەوە تاوەکو ئێستا هیچ ڕێککەوتنێکی فەرمی لە نێوان ئەم دوو هێزەدا نەکراوە و هەر چەند ساڵ جارێکیش گەڕێکی شەڕ لە نێوانیاندا ڕویداوە، کە دیارترینیان شەڕێکی درێژخایەن بوو کە لە ١٩٩١ وە تاوەکو ١٩٩٧ی خایاند.

لە دوای هاتنی داعش بۆ عێراق و ڕۆژئاوا و باشوری کوردستان، جارێکی دیکە گەڕێکی دیکەی ململانێکانی پارتی و پەکەکە دەستیپێکردەوە و، پارتی سنوری نێوان باشور و ڕۆژئاوای داخست و خەندەقی لێدا و ئەو دوو بەشەی کوردستانی لە یەکدی دابڕی، ئەوەش بەهۆی ئەو ناکۆکیانەی کە لە نێوان پەیەدە و بەشێک لەو پارتە کوردیانەی ڕۆژئاوای کوردستان کە نزیکن لە پارتیەوە.

ئەوەش ناکۆکیەکانی زیاترکرد و بەشداری پێشمەرگە لە شەڕی کۆبانێ و ئازادکردنی شنگال لە لایەن گەریلاکانی پەکەکەوە، نەیتوانی ئەو خەندەقە پڕبکاتەوە کە لە نێوان ئەم دوو هێزەدا دروستبوو.

لە دوای ئۆپەراسیۆنەکەی تورکیا بۆ سەر ناوچەی هەفتانین و بەشێکی زۆری ناوچە سنوریەکانی هەرێمی کوردستان بە بیانوی بونی گەریلاکانی پەکەکەوە لەو ناوچانە، جارێکی دیکە ناکۆکیەکانی نێوان پارتی و پەکەکە سەریهەڵدایەوە، بەرپرسانی پارتی پێیانوایە بوونی گەریلاکانی پارتی کرێکارانی کوردستان زیان بە هەرێم  دەگەیەنێت و داوا دەکەن خاکی هەرێم جێ بێڵن.

لە بەرامبەریشدا بەشێک لە بەرپرسانی پەکەکە، پارتی بەوە تۆمەتبار دەکەن کە لە ڕێگەی دامودەزگاکانی حکومەتی هەرێمەوە هاوکاری هەواڵگریی تورکیا دەکات و کارئاسانی بۆ دەزگای سیخوری تورکیا دەکات بۆ بە ئامانجگرتنی سەرکردەکانیان لە ڕێگەی فڕۆکە بێ فڕۆکەوانەکانەوە.

هێرشە توندەکانی پارتی و پەکەکە بۆ سەر یەکتری و ڕوداوی تەقینەوەی بۆمبێک بە هێزەکانی پێشمەرگە لە چەمانکێ و ڕەوانەکردنی هێزێکی زۆر لە لایەن پارتیەوە بۆ ئەو ناوچانەی کە گەریلای لێیە، ترس و دڵەڕاوکێی لای زۆرێک لە هاوڵاتیان و بەشێک لە سیاسیەکانی هەرێمی کوردستان دروستکردووە، ئەوەش بەهۆی ئەوەی کە ئەم دوو هێزە لە ماوەی چەند ڕۆژێکی کەمدا، چەندین ڕاگەیەندراویان لە سەر ئاستی باڵا لە دژی یەکتر بڵاوکردووەتەوە و ئاماژەی ڕون بۆ دەستپێکردنی گەڕێکی دیکەی شەڕ لە نێولان ئەم دوو لایەنەدا بەدیدەکرێت.