شارپرێس:

سەرۆکایەتی شارەوانیی سلێمانی رایدەگەیەنێت، ئەنجامدانی قوربانی و کاری ئاژەڵداری لە شەقام و گەڕەکەکان قەدەغەیە، دەشڵێت، سەرپێچیکاران ڕوبەڕوی ڕێکاری یاسایی دەکرێنەوە.

سەرۆکایەتی شارەوانیی سلێمانی لەڕاگەیەنراوێکدا ئاماژەی بەوەکرد،" ئەنجامدانی قوربانی پێویستە لە کوشتارگەکاندا بکرێت و کاری ئاژەڵداریش لە مەیدانی کڕین و فرۆشتنی ئاژەڵان، بە پێچەوانەوە لەسەر شەقام و گەڕەک و ناو ماڵاندا ڕێگەپێدراو نییە و سەرپێچیکاران ڕوبەڕوی ڕێکاری یاسایی دەکرێنەوە ".

ئەوەشیخستەڕوو،" داواکارین لە لایەنە پەیوەندیدارەکان و مامۆستایانی ئاینی بەشداری هەڵمەتێکی هۆشیاریی بکەن لەسەر ئەم بابەتە و هانی خێرەومەندان بدەن کە پابەندبن بە ڕێنماییەکانی شارەوانیی و قایمقامییەتی پارێزگای سلێمانی و بەڕێوەبەرایەتی ڤێرتێرنەری سلێمانی تاوەکو لە كوشتارگەكان ئاژەڵەكانیان بۆ قوربانیكردن ئامادە بکەن ".

شارەوانی سلێمانی هەمانکاتدا داوا لەهاوڵاتییان دەکات پاکوخاوێنی شۆستە و شەقامەکان ڕابگرن و سەرپێچی ڕێنماییەکان نەکەن، چونکە بەو کارە دەبنە هۆکاری بڵاوبونەوەی نەخۆشیی و شێواندنی ژینگە و پیسکردنی شۆستە و شەقامەکان، و تیمەکانمان لە بەشی خزمەتگوزاریی و زیادەڕەویی بە هاوکاری لیژنە هاوبەشەکان ڕۆژانی جەژن لە ئەرکدا دەبن بۆ پاراستنی خاوێنی و تەندروستی هاوڵاتییانی خۆشەویست.