شارپرێس:

لەپێشهاتێکی سیاسی گرنگدا، سەرچاوەیەکی ئاگاداری حکومەتی عێراق ئاشکرایکردوه‌، بەغدا یاسای نوێی بۆ ڕێکخستنی جوڵەی بەرپرسانی ئێرانی لەناوخۆی وڵاتدا جێبەجێکردوە، به‌گوێره‌ى ڕێکارە نوێیەکان، هاتوچۆی هەر بەرپرسێکی ئێرانی بەتایبەت کەسایەتییە ئەمنی‌و سەربازییەکان، دەبێت تەنها لەڕێگەی کەناڵە دپلۆماسییە فەرمییەکان‌و بەئاگاداری پێشوەختەی حکومەتی عێراق بێت، ئەمەش وەک کۆتاییهێنانێک بەمیکانیزمە کۆنەکان کە لەسەر بنەمای کۆبونەوەی ڕانەگەیەندراو بون.

هاوکات، هەمان سەرچاوە ئەو دەنگۆیانەی ڕەتکردەوە کە باس لەوەدەکەن، عێراق بڕیاری دەرکردنی بۆ ئیسماعیل قائانی فەرماندەی فەیلەقی قودسی ئێرانی دەرکردبێت یان وەک کەسێکی نەخوازراو ناساندبێتی، لەو چوارچێوەیەشدا، هاوپەیمانی ئاوەدانکردنەوەو گەشەپێدان لەبەیاننامەیەکی فەرمیدا ئەو هەواڵانەی بەتەواوی ڕەتکردەوەو بەدور لەڕاستی ناویبرد.

ئەم گۆڕانکارییانە دوای ئەوەدێن، عەلی زەیدیی سەرۆک وەزیرانی عێراق، لەمیانی کۆبونەوەکانی لەگەڵ بەرپرسانی ئەمریکی لەبەغدا، داواکاری ڕونی پێگەیشتوە بۆ کەمکردنەوەی سەردانە نهێنییەکانی لایەنی ئێرانی.

ئەم هەنگاوە لەکاتێکدایە کە عێراق خۆی بۆ سەردانێکی فەرمی زەیدیی بۆ واشنتۆن ئامادەدەکات، تێیدا بڕیارە دۆسیەی هەستیاری وەک کۆتاییهێنان بەئەرکی هاوپەیمانی نێودەوڵەتی، بەرەنگاربونەوەی گەندەڵی‌و پلانی كۆكردنه‌وه‌ى چەک لەدەستی دەوڵەتدا تاووتوێبکرێن.

حکومەتی عێراق جەختیکردوەتەوە، ئەم بڕیارانە بەواتای ئاڵۆزکردنی پەیوەندییەکان یان پچڕاندنی کەناڵەکانی پەیوەندی لەگەڵ تاران نایەت، بەڵکو ئامانج لێی پاراستنی شکۆو سەروەری دەوڵەت‌و بونیادنانی پەیوەندییەکی هاوسەنگە لەگەڵ سەرجەم هاوبەشە هەرێمی‌و نێودەوڵەتییەکان لەسەر بنەمای ڕێزگرتن لەبڕیاری سەربەخۆی عێراق.