شارپرێس:

وەزیری دەرەوەی سوریا ڕایگەیاند، سەردانەکەی ماکرۆن بۆ دیمەشق ڕەوتی پەیوەندییەکانی گۆڕیی‌و متمانەی نێودەوڵەتی بۆ وڵاتەکەی گەڕاندەوەو هۆشداریشدەدات، هێزە ئەمنییەکان لێپرسینەوە لەهەرلایەنێک دەکەن کە بیەوێت بەربەست لەبەردەم ئەم پێشکەوتنە دیپلۆماسییە نوێیەدا دروستبكات.

ئەسعەد شەیبانی وەزیری دەرەوەی سوریا ڕایگەیاند، سەردانە مێژوییەکەی ئیمانوێل ماکرۆن سەرۆکی فەرەنسا بۆ دیمەشق، وەرچەرخانێکی بنەڕەتی بوو لەڕەوتی پەیوەندییەکانی نێوان هەردوو وڵاتداو قۆناغێکی نوێی لەهاوبەشیی ستراتیژیی لەسەر بنەمای بەرژەوەندیی هاوبەش‌و ڕێزی دولایەنە هێنایە ئاراوە.

وەزیری دەرەوەی سوریا ئاماژەی بەوەکرد، ئەم سەردانە بەواژۆکردنی چەندین یاداشتی لێکتێگەیشتن‌و دەستپێکردنی ڕێڕەوی هاوکاریی ستراتیژی کۆتاییهاتوە، ئەمەش بەڕونی گەشەکردنی متمانەی نێودەوڵەتی بەسوریاو ڕۆڵە میحوەرییەکەی لەبەهێزکردنی ئاسایش‌و سەقامگیریی ناوچەکەدا دەسەلمێنێت.

لەسەر ئاستی ناوخۆ-ش، شەیبانی جەختیکردەوە، دەوڵەتی سوریا بەردەوامدەبێت لەپاراستنی هاوڵاتیانی‌و ڕوبەڕوبونەوەی تیرۆر بەهەموو شێوەکانییەوە، چونکە ئاسایش بەبنەمای سەرەکیی بوژانەوەی ئابوریی‌و گەشەپێدان دادەنرێت.

هۆشداریشیدا، لایەنە پەیوەندیدارەکان به‌گوێره‌ى یاسا لێپرسینەوەی توند لەگەڵ هەرکەس یان لایەنێک دەکەن کە تێوەگلانی لەتێکدانی ئاسایشی وڵاتدا بسەلمێنرێت.

پەیوەست بەپێگەی نێودەوڵەتی وڵاتەکەش، وەزیری دەرەوەی سوریا ڕایگەیاند، هیچ هەوڵێک بۆ تێکدانی ڕەوتی پێشکەوتنەکانی سوریا سەرکەوتوو نابێت‌و وڵاتەکەی بەپێداگرییەوە بەرەو گێڕانەوەی ڕۆڵە هەرێمی‌و نێودەوڵەتییەکەی هەنگاو دەنێت.

وتیشی، "پشتیوانیکردنی سوریا لەئێستادا، پشتیوانیکردنە لەسەقامگیریی تەواوی ناوچەکە؛ هاوبەشییە نێودەوڵەتییە گەشەسەندوەکانیش دەیسەلمێنن کە قۆناغی گۆشەگیریی بوە بەڕابردوو و داهاتوش لەسەر بنەمای هاوکاریی‌و گەشەپێدان بونیاد دەنرێت".