شارپرێس:
لەم دوایەی دووییدا نەوەی نوێی فرۆكەی شەڕكەری روسی دەركەوتن لەنموونەی فرۆكەكانی "سو-٣٥" و فرۆكەی "مێگ-٣٥" .
هەردوو فرۆكەكە تاڕادەیەكی زۆر لەیەكدەچن بەجۆرێك هەردووكیان هەمان تەقەمەنی بەكاردەهێنن، دەكرێت بە موشەكی نوێی زێدەخێرا تەیار بكرێن، كە دەتوانن لەدووری ٤٠٠ كیلۆمەتر فرۆكەكانی دوژمن بەئامانج بگرن، كە فرۆكەی "سو-٣٥" بە ١٢ مووشەك تەیار دەكرێت لەكاتێكدا "مێگ-٣٥" بە ٨ موشەك تەیار دەكرێت.
هەردوو فرۆكە روسییەكە بزوێنەرەكەیان تەكنەلۆژیای پاڵنانی ئاڕاستەكردنی تێدایە، كە توانایەكی لەڕاددەبەدەری جوڵە و مانۆڕكردنیان پێدەدات.
وەك زانراوە فڕۆكەی شەڕكەری "سو-٣٥" راداری Irbis ی تێدا بەكارهێنراوە، كە دەتوانێت فرۆكە جەنگییەكانی دوژمن لەدووری ٤٠٠ كیلۆمەتر بدۆزێتەوە لەكاتێكدا دەتوانێت فڕۆكە شەبەحییەكان لەدووری ٨٠ كیلۆمەترەوە دەدۆزێتەوە، دەشتوانێت لەیەك كاتدا بەدوای ٣٠ ئامانج بكەوێت.
هێشتا تواناكانی فرۆكەی "مێگ-٣٥" ئاشكرا نەكراون، بەڵام جۆری تەقەمەنییەكانی ئەوە دەردەخەن، كە دەتوانێت لەدوورییەكی زۆرەوە فرۆكەكانی دوژمن ئاشكرا بكات.
بەڕای هەندێك لە شارەزایانی بواری سەربازی پێدەچێت فڕۆكەی "سو-٣٥" بەهێزتر بێت، بەڵام فرۆكەی "مێگ-٣٥" چەندین تایبەتمەندی گرنگی هەیە لەوانە دەتوانێت لەسەكۆیەكی كورتترەوە بنیشێتەوە.
لەگۆڤاری " چاودێری سەربازی" دا هاتووە، كە فڕۆكەی "سو-٣٥" فڕۆكەیەكی ناوازەیە دەتوانرێت بۆ ڕووبەڕووبوونەوەی باشترین فۆكە جەنگییەكانی جیهان پشتی پێببەسترێت، بەڵام "مێگ-٣٥" یش توانای ئەوەی هەیە بەتایبەت لەچەندین لایەنەوە بەسەر فرۆكە رۆژئاواییەكاندا زاڵە.
وەرگێڕان: ئاكۆ عەبدوڵڵا ئاڵی