شارپرێس:
پشتی دهربازبوونا حهفت سالان ژ داگیركرنا قهزا شنگالێ ژ ئالیێ رێكخراوا تیرۆرستیا داعش ڤه پێنج گۆڕێن بكۆم ل وێ قهزایێ هاتنه دیتن و رۆفاتێن وان هاتنه دهرخستن.
رێڤهبهریا پۆلیسێن شنگالێ دڕاگههاندنهكێدا ئاشكراكر، ب ههڤكاری دگهل نوژداریا دادا نهینهوا ڕابووینه ب ڤهكرنا پێنج گۆرێن بكۆم كو ل سالا 2014ێ ژ ئالیێ داعش ڤه هاتبوونه كۆمكوژكرن و بنئاخكرم.
ئاماژه ب وێیهكێ ژی كر، پشتی ڤهكرنا وان گۆران و ڕاكرنا وان رۆفاتان بۆ نوژداریا دادا بهغدا هاتنه ڤهگوهاستن بۆ ئهنجامدانا پشكنینان و پشتراستبوون و ئاشكراكرنا ناسنامهیێن وان.
ههڤدهم، بهیانناما پۆلیسێن شنگالێ بتنێ ئاماژه ب دیتن و ڕاكرنا پێنج گۆرێن بكوم ل چهند دهڤهرێن جودا كریه، لێ ژێدهرهكێ ئاگههدار ل شنگالێ بۆ تۆڕا نووچهیی یا ژیان ڕاگهناند، ل گۆرهی ڤهكۆلینێن دهستپێكی بۆ وان دیاربوویه رۆفاتێن 11 كهسان دناڤا وان گۆراندا بووینه.
ئهڤه د دهمهكی دایه، ههر ژ سالا 2014ێ لدهما هاتن و دهستبسهرداگرتنا قهزا شنگالێ ژ ئالیێ رێكخراوا تیرۆرستیا داعش ڤه چهندین كهس ل وێ قهزایێ كۆمكوژكرن و بنئاخكر، ههیا نها و پشتی بورینا حهفت سالان هێشتا چهندین گۆرێن بكۆم ماینه و رۆفاتێن دناڤدا نههاتنه دهرخستن.
