شارپرێس:

جیهان وەک تەنها هێزێکی سەربازیی سەیری یەکینەکانی پاراستنی ژن (یه‌په‌ژه‌) دەکات، به‌ڵام ئه‌و هێزە پەیامێکی ڕونى هه‌یه‌و له‌زارى فه‌رمانده‌یه‌كى باڵایه‌وه‌ ده‌ڵێت، "ئەو دەستەیەی چەکی دژی داعش هەڵگرت، دەبێت لەسەر مێزی گفتوگۆکانیش جێگەی بێتەوە"، ڕۆکسان محەمەد وتەبێژی یەپەژە لەنوێترین دەرکەوتنیدا نەک هەر باسی ڕابردوو دەکات، بەڵکو هۆشدارییەک بۆ داهاتوش ڕادەگەیەنێت.

قوربانیدانی بێوێنە؛ ئەفسانەی تێکشکاندنی داعش
ڕۆکسان محەمەد وه‌ك شانازییه‌ك ئاماژە بەوەدەکات، کۆتاییهێنان بەخەلافەتە جوگرافییەکەی داعش لەساڵی 2019دا، ڕێکەوت نەبوو، ئەوە ئەنجامی ئیرادەی کچانی کوردو پێکهاتەکانی دیكه‌ بوو کە لەچوارچێوەی هێزەکانی سوریای دیموکرات (هەسەدە)و بەپشتیوانی هاوپەیمانان، گەورەترین مێژویان تۆمارکرد، ئەو جەختدەکاتەوە، "قوربانییە جەستەییەکان تەنها بۆ پاراستنی خاک نەبوە، بەڵکو بۆ چەسپاندنی ناسنامەی ژن بوە لەناوچەکەدا".

لەبیرچونەوە یان پشتگوێخستن؟
خاڵی هەرە کاریگەری قسەکانی وتەبێژی یەپەژە بۆ ئاژانسى فرانس پرێس لەو هۆشدارییەدایە کە ئاراستەی لایەنە نێودەوڵەتییەکان‌و ناوخۆییەکانی دەکات، ده‌ڵێت، "ناکرێت خوێنی شەڕڤانان بۆ پاراستنی جیهان بڕژێت، بەڵام لەکاتی داڕشتنی نەخشەی سیاسیی سوریادا پەراوێزبخرێن"، جه‌ختیشده‌كاته‌وه‌، "یەپەژە ئێستا لەقۆناغی بەرگریی سەربازییەوە هەنگاو دەنێت بەرەو بەرگریی لەدەستکەوتەکان، داواکارییەکەش تەنها سوپاسگوزاریی نییە، بەڵکو دانپێدانانی فەرمییە بەو ڕۆڵە سیاسیی‌و سەربازییەی کە لەماوەی 10 ساڵی ڕابردودا گێڕاومانە".

داهاتویەکی نادیارو ئیرادەیەکی پۆڵایین
لەسایەی گۆڕانکارییەکانی ناوچەکەو ململانێی هێزە هەرێمییەکان، یەپەژە دوپاتیدەکاتەوە، ئیرادەی شەڕڤانانیان وەک خۆی ماوەتەوە، ئەو لێدوانانە لەکاتێکدایە کە دەنگۆکان دەربارەی ڕێککەوتنی نوێ لەسوریا زیاد دەبن؛ بۆیە یەپەژە دەیەوێت له‌زارى وته‌بێژه‌كه‌یه‌وه‌ پێشوەختە بڵێت، "هیچ ڕێککەوتنێک بەبێ بونی ڕاستەقینەی ئێمە سەرناگرێت".

ڕاپۆرتەکەی فرانس پرێس‌و لێدوانەکانی ڕۆکسان محەمەد، تەنها گێڕانەوەی مێژوو نین، بەڵکو کێشانی هێڵێکی سورن، ژنانی شەڕڤان کە جیهانیان لەمەترسیی داعش پاراست، ئێستا چاوەڕێی جیهانن تا دان بەو ڕاستییەدابنێت کە "ئاشتی لەسوریا بێ بەشداریی ئەوان، تەنها خەونێکی سەر کاغەز دەبێت".

ئەوان تەنها پارێزەری خاک نەبون، بەڵکو پاسەوانی ئەو خەونە بون کە لەناو تەپوتۆزی جەنگدا خەریک بوو دەخنکا، ژنە شەڕڤانەکان سەلماندیان کە فیشەک لەدەستی ئەواندا تەنها بۆ کوشتنی تاریکی نییە، بەڵکو بۆ نواندنی سەماو ئیرادەیە لەبەردەم مەرگدا، بۆیه‌ مێژوو دەبێت بەڕێزەوە لەبەردەم ئەو چەکانە دابنیشێت کە بەبۆنی گوڵ‌و باروتەوە، نەخشەی ئازادییان بۆ نەوەکانی داهاتوو کێشا، ئەگەر جیهان قەرزاری ئارامییەک بێت، بێگومان بەشێکی زۆری ئەو قەرزە بۆ ئەو کچانەیە کە لەجیاتی بوکێنیی، بەجلوبه‌رگى سه‌ربازیى‌و کڵاشینکۆفەوە بونە قەڵغانی مرۆڤایەتی.

هه‌روه‌ك ڕۆكسه‌ن وتویه‌تى، ژنە شەڕڤانەکان ئەو داستانە زیندوەن کە بەخوێن نوسراو بەئیرادە مۆرکرا، ئەوان نیشانیاندا کە چیاکان تەنها پەناگەی پیاوان نین، بەڵکو لانکەی ئەو ژنانەشن کە بڕیاریانداوە چیتر قوربانیی نەبن، بەڵکو خۆیان مێژویەکی نوێ بۆ ڕۆژهەڵاتى ناوین بنوسنەوە.