شارپرێس:
ڕۆژنامەی "وول ستریت جۆرناڵ" ئەمرۆ شەممە بڵاویکردەوە کە هەواڵگری ئەمریکا پێیوایە لە نێوان 15 بۆ 20 هەزار کەس، کە چەکدارانی ڕێکخراوی داعشیان تێدایە، لە کەمپی هۆل لە سوریا هەڵاتوون و ئێستا لە سەرانسەری وڵاتدا بڵاوبوونەتەوە.

بەپێی وتەی بەرپرسانی ئەمریکی، دوای ئەوەی هێزەکانی حکومەتی کاتیی سوریا کۆنترۆڵی کەمپەکەیان کرد، دۆخی ئەمنی لە هەفتەکانی کۆتاییدا بە تەواوی هەرەسی هێناوە.

 هاوکات ڕۆژنامەی "فاینانشیاڵ تایمز" ئاماژەی بەوە کردووە کە هەزاران زیندانی توانیویانە لە ڕێگەی درزەکانی سیاجی کەمپەکەوە ڕابکەن و هەندێکیان بە شێوەیەکی نایاسایی گەیشتوونەتە عێراق و تورکیا.

لە لایەکی ترەوە، ئاژانسی "سانا"ی سوریی ڕایگەیاندووە کە حکومەت سەرقاڵی گواستنەوەی نیشتەجێبووەکانی تری کەمپەکەیە بە مەبەستی چۆڵکردنی یەکجاری، ئەمەش لەکاتێکدایە کە نیگەرانییە نێودەوڵەتییەکان سەبارەت بە مەترسییەکانی بڵاوبوونەوەی دووبارەی چەکدارانی داعش لە ناوچەکەدا لە زیادبووندایە.


ئاکۆ عەبدوڵڵا ئاڵی