شارپرێس:

وەزارەتی کشتوکاڵ و سەرچاوەکانی ئاو بڕیاریدا بە هەڵگرتنی بڕیاری قەدەغەی ڕاوکردن و ئاساییبونەوەی وەرزی ڕاوکردن.

وەزارەتی کشتوکاڵ و سەرچاوەکانی ئاوی حکومەتی هەرێم لەڕاگەیەنراوێکدا دەڵێت،" دوابەدوای بڕیاری وەزارەت سەبارەت بە پاراستنی سامانی ماسی و وەرزی قەدەغەی ڕاوکردن و بەهۆی تەواوبونی ماوەی دیاریکراوی وەرزی قەدەغەی ڕاوەماسی، ئەمڕۆ دوشەممە، 15/6، لەلایەن بەڕێوەبەرایەتی گشتی سامانی ئاژەڵ و ڤێتێرنەری بڕیاردرا بە هەڵگرتنی بڕیاری قەدەغەی ڕاوکردن و ئاسایی بوونەوەی وەرزی ڕاوکردن".

ئەوەشیخستەڕوو، ڕاوکردن بە کارەبا و ماددە ژەهراوییەکان و ماددە تەقەمەنییەکان و تۆڕی کون و ورد ، کە ببێتە مایەیی لە ناوبردنی به کۆمەڵی زیندەوەرەکانی ئاوی لە هەموو کاتێکدا قەدەغەیە و ڕێگەپێدراو نابێت.

وەزارەتی کشتوکاڵ و سەرچاوەکانی ئاو باسی لەوەشکرد، بۆ جێبەجێکردنی ئەم بڕیارە و گرتنەبەری رێکاریی یاسایی و کارگێری سەرجەم فەرمانگەکان و دامەزراوە پەیوەندارەکان ئاگادار کراونەتەوە.