شارپرێس:

پەرلەمانی ئێران ئەمڕۆ یەکشەممە ڕەزامەندیی لەسەر دامەزراندنی میهرداد ئەخلاقی کیتابچی وەک وەزیری بەرگریی ئەو وڵاتە دەربڕیی، دوای چەند مانگێک بەڕێوەبردنی کاتیی وەزارەتەکە.

دامەزراندنی ئەو لەکاتێکدایە کە تاران گرنگییەکی زۆر بەپیشەسازیی بەرگریی ناوخۆیی دەدات، بەتایبەتیی لەبواری موشەک‌و درۆنەکاندا؛ ئەمەش لەگەڵ بەردەوامبونی سزاکان‌و ڕێگرییەکان لەبەدەستهێنانی تەکنەلۆژیاو کەرەستە سەربازییە بیانییەکان.

عەزیز نەسیرزادە پۆستی وەزیری بەرگریی ئێران دوای کوژرانی وەزیری پێشوو لەهێرشەکانی ئەمریکاو ئیسرائیل بۆسەر ئێران لەکۆتایی شوباتی ڕابردوو، بەشێوەی کاتیی بەڕێوەدەبرا، پاشان مەجید ئیبنولڕەزا بۆ بەڕێوەبردنی کاروباری وەزارەتەکە دیاریکرابوو.

مەسعود پزیشکیان سەرۆکی ئێران لە6ی ئاب کیتابچی بۆ پۆستەکە كاندیدكردو ناوی بۆ وەرگرتنی متمانەی پەرلەمان پێشکەشکرد.

کیتابچی پێشتر سەرۆکایەتیی ڕێکخراوی پیشەسازیی بەرگریی‌و ڕێکخراوی پیشەسازیی ئاسمانی‌و بۆشایی ئاسمانیی ئێرانی کردوە.

ئەو بەهۆی ڕۆڵی لەبەرنامە چەکدارییەکانی ئێراندا، لەلایەن ئەمریکاو ئەوروپاوه‌ خراوەتە ژێر سزاکان.

ناوبراو لەپەرلەمان بەرنامەیەکی پێشکەشکرد کە 16 پێشینەی لەخۆگرتبوو؛ لەوانە ڕێکخستنەوەی وەزارەتی بەرگریی، پەرەپێدانی سیستەمەکانی بەرگریی ئاسمانی، نۆژەنکردنەوەی ژێرخانی پیشەسازیی سەربازیی‌و خێراکردنی پەرەپێدانی تەکنەلۆژیا بەرگرییە نوێیەکان.

ئەم گۆڕانکارییانە لەکاتێکدا ڕودەدەن کە تاران هەوڵدەدات توانای سەربازیی خۆی دوبارە بونیادبنێتەوە‌و سیستەمەکانی بەرگریی بەهێز بکات.