شارپرێس:
لە سنووری ناوچەی مەریوان لەڕۆژهەڵاتی كوردستان لەبەرەبەیانی ڕۆژی چوارشەممەوە بۆردومان و شەڕ و پێكدادان دەستیپێكردووەتەوە.
بەگوێرەی سەرچاوەكان لە سنوورەكە، لەبەرەبەیانی ڕۆژی چوارشەممە كاتژمێر حەوتی بەیانییەوە سوپای پاسداران بەچڕی سنووری گوندەكانی قامیشەڵە، گاگلی و هەنارەشێخانی بۆردومان كردووە.
بەوتەی سەرچاوەكان ئەم هێرشانە بۆ ماوەی چەند كاتژمێرێك درێژەی هەبووە بە فڕۆكەی بێفڕۆكەوان و تۆپ، زیانی زۆری لە ژینگەی ناوچەكە و ڕەز و باخی خەڵكی سنورەكە داوە، بەڵام لەبارەی زیانی گیانی هیچ زانیاری بڵاونەكراوەتەوە.
هەندێك سەرچاوەی دیكەی نزیك لە یەكینەكانی پاراستنی ڕۆژهەڵاتی كوردستان یەرەكە، باس لەڕوودانی پێكدادانی چەكداری لەنێوان یەرەكە و سوپای پاسداران لەناوچەكەدا دەكەن.
لە ماوەكانی ڕابردووشدا چەند جارێك سوپای پاسداران ئەم ناوچەیەی بۆردومان كردووە و شەڕ و پێكدادانیش لەنێوان یەكینەكانی پاراستنی ڕۆژهەڵاتی كوردستان یەرەكە و سوپای پاسداراندا ڕوویداوە.