شارپرێس:
بەڕێوه‌بەری سەنتەری میترۆ وه‌ڵامێكى توندى یاریده‌درێكى عیماد ئه‌حمه‌د ده‌داته‌وه‌و ڕایده‌گه‌یه‌نێت، "یاریدەدەرەكەی عیماد ئه‌حمه‌د، بازدەدات بەسەر ئەو گۆمە خوێنەی شەوی لالەزار، ئەوەندە توڕەیە لەمیدیای ئەهلی‌و سەنتەری داكۆكی لەمافی ڕۆژنامەنوسان، هەموان دەكاتە خانەی شەڕی بەوەكالەت"، ده‌شڵێت:"ئەمە چ لۆژیك‌و ئەخلاقێكە دەتانەوێ بچەسپێت‌و هاوڵاتی‌و ڕەخنەگری پێ دەمكوت بكەن؟".
دیاری محه‌مه‌د بەڕێوه‌بەری سەنتەری میترۆ له‌ڕاگه‌یه‌نراوێكدا ئاماژه‌ى به‌وه‌داوه، یاریدەدەرێكی عیماد ئەحمەد ئەندامی مەكتەبی سیاسیی‌و لێپرسراوی مەكتەبی ڕاگەیاندن‌و هۆشیاری یەكێتیی لەڕۆژنامەی كوردستانی نوێدا بەیاننامەیەكی بۆ ڕاستكردنەوەی ڕێڕەوی سیاسی یەكێتیی، لەبارەی ڕێكخراوو میدیای ئەهلی ئۆپۆزسیۆن بڵاوكردوه‌تەوە، پێشنیازیكردوە، "جڵەو بكرێن".
له‌و ڕوه‌شه‌وه دیاری محه‌مه‌د ده‌ڵێت، "پێمخۆشە لەمێژوی نوێی حوكمڕانی كوردستاندا، نەوە دوای نەوە بۆ یەكتری بگێڕنەوە یەكێتیی كەسی نەدۆزییەوە كۆمەڵگەی مەدەنی سلێمانی پێ بترسێنێ، جگە لەیاریدەدەرێكی كە بەتەمای پۆستی وەزیری ڕۆشنبیرییە، دەیەوێ ئەوەی عیماد ئەحمەد ماویەتی لەناو "چەپ"ی كوردستانیدا، بیكاتە ئامرازێك بۆ داركاریكردن‌و دەمكوتكردنی میدیاو كۆمەڵی مەدەنی لەشاری سلێمانی".
ئاماژه‌ى به‌وه‌كردوه، "یاریدەدەرەكەی لێپرسراوی مەكتەبی ڕاگەیاندن‌و هۆشیاری یەكێتیی، باز دەدات بەسەر ئەو گۆمە خوێنەی شەوی لالەزار، ئەوەندە توڕەیە لەمیدیای ئەهلی‌و سەنتەری داكۆكی لەمافی ڕۆژنامەنوسان، هەموان دەكاتە خانەی شەڕی بەوەكالەت‌و "ئاو بكەینە ئاشی ڕكابەری یەكێتیی" لەبەرامبەر "قازانجی ماددی‌و پارەو تومویل".
ئه‌وه‌شى باسكردوه، "لێرەدا دەمەوێت ڕاستییەك بڵیم لەماوی 10 ساڵی كاردنم لەسەنتەری میترۆ، خۆم پرۆپۆزەڵم نوسیوەو هەموو هاوكارییە داراییەكانی دەرەوەی وڵات، خۆم چاودێریی وەرگرتنی هاوكاریەكان‌و خەرجكردنیم كردوە، دڵنیابن پارەی قاچاخچێتی نەوت‌و گازی دزراوو دوگ‌و هێلكەو دەرمان‌و ئەندۆمی بەسەرچوی تێدانەبوە".
وه‌كو دیاری محه‌مه‌د ئاماژه‌ى پێكردوه، "ئەم فەرهەنگە ناشیرینەی دەتانەوێ بیچەسپێنن ئەوەیە كە هەركەسێ لەهەولێر ڕەخنەی لەپارتی گرت، ئەوە شەڕی بەوەكالەت بۆ یەكێتیی دەكات، ئەوەشی لەسلێمانی ڕەخنەی لەیەكێتیی گرت شەڕی بەوەكالەت بۆ پارتی دەكات‌و ململانێی بۆ ناحەزانی یەكێتیی بەڕێوەدەبات".
ده‌پرسێت، "ئەمە چ لۆژیك‌و ئەخلاقێكە دەتانەوێ بچەسپێت‌و هاوڵاتی‌و ڕەخنەگری پێ دەمكوت بكەن؟ ئەمە ئیرهابی فكری نەبێت، پێمبڵێن چییە؟ ئەرێ ئەم تەخوینكردنەی میترۆ تاكەی؟ ئەم كارگەی درۆیە كەی دادەخەن؟ ئەرێ لەگەڵم نەبی دوژمنمی، نەبڕایەوە؟ ئەم بانگەشەیە بۆ دەسەڵاتی ڕەها بەس نییە؟ ئەم هەموو پاساوە بۆ توندوتیژی ماندوی نەكردن؟ بەسە ئیتر بەناشیرینكردنی ئەوانی تر جوان نابن؟".
جه‌ختیكردوه‌ته‌وه، "من لەخانەوادەیەكم كە دوو برام شەهیدی یەكێتییە، زۆر خەمبارم كە دەبینم كەسانی هەلپەرست، لەبری قسەی خێر بۆ حزبەكەیان‌و سلێمانی، ڕەخنە لەنەرمونیانی سیاسی بەڕێز (مام جەلال) دەگرێ، دەیەوێت ئەوەی ماوە لەپەراوێزی ئازادی سیاسیی‌و ڕێكخراوەیی‌و ڕادەربڕین "جڵەو" بكرێت".
له‌كۆتاییشدا وتویه‌تى، "نازانم ئەمە گاڵتەجاڕی قەدەرە، یان ڕاسپاردەی كۆنگرەی هاوپەیمانی سۆسیال دیموكرات جیهانی عەرەبی؟ ئەوە ببینین نەوەی پاش مەرگی (مام جەلال) پێمان دەڵێن، (چەپكە گوڵەكە) تا ئێرەو چیرۆكەكە تەواو، ئیترسەردەمی جڵەوكردن‌و دەمكتكردن‌و پاكتاوكردنی ئازادی، سەردەمی عەدالەتەكەی عیماد دەستیپێكرد".
