شارپرێس:

بەرپرسێکی حکومەتی هەرێم زانیاری نوێ لەبارەی هەوڵەکان بۆ دابەشکردنی موچەی مانگی پێنج لەپێش جەژنی قوربان ئاشکرادەکات و دەڵێت، لیستی موچە ئامادەیە و دەست بە تەمویلکردنی دەکرێت.

هیوا ئەفەندى، سەرۆکى فەرمانگەى تەکنەلۆجیا و زانیارى حکومەتى هەرێمى کوردستان، ڕایگەیاند،  لیستى مووچە بە سیستمى پەیڕۆڵ تەواو بووە و وردەکارى ژمێریاریی فەرمانبەران لە ئەپى KRDPASS دانراوە.

ئەوەشیخستەڕوو،  بۆ تەمویلى مووچەى مانگى ئایارى مووچەخۆران، وەزارەتى دارایی هەرێمى کوردستان و وەزارەتى دارایی فیدڕاڵ، کارەکانیان دەستپێدەکەن.

هاوکات، ماڵپەڕی "سۆمەرییە نیوز"ی عێراق لەزاری ئەندامێکی پەرلەمانی عێراقەوە ئاشکرایدەکات، ئەگەر تاکو کۆتایی ئەم هەفتەیە وەزارەتی دارایی هەرێم تەرازوی پێداچونەوەو لیستی موچە و داهاتی ناوخۆی هەرێم رەوانەی بەغدا بکات، بەئەگەری زۆرەوە لەسەرەتای هەفتەی داهاتوو تاکو پێش جەژنی قوربان موچەی مانگی پێنجی موچەخۆرانی هەرێم خەرجدەکرێت.